Իջեւանի տարածաշրջանի սահմանամերձ Բերքաբեր գյուղում գործող ազգագրական թանգարանը ստեղծվել է բերքաբերցի բանաստեղծ Նորայր Արզումանյանի ջանքերով: Ադրբեջանի սահմանից մի քանի հարյուր մետր հեռավորությամբ գտնվող թանգարանում մեր պատմության նյութական վկայություններն են:
Ն. Արզումանյանը թանգարանի տնօրենն է, թանգարանի միակ աշխատողը, սակայն աշխատավարձ չի ստանում: Ցուցանմուշները վատ պայմաններում են պահվում: Ն. Արզումանյանը հպարտանում է թանգարանի ցուցանմուշներով, հատկապես՝ հին, մեծ կարասով:
Բերքաբեր համայնքի ղեկավար Արթուր Մադաթյանին հարցրինք՝ ե՞րբ է թանգարանը նորոգվելու: Նա ասաց, որ 3 տարի առաջ Միքայել Վարդանյանի ֆինանսական աջակցությամբ թանգարանի տանիքը փոխվել է, պատերը դրսից սվաղել են, փլուզված մի պատը վերականգնվել է:
Կարդացեք նաև
Գյուղապետն ասաց, որ հնարավորություն կար շենքի ներսն էլ նորոգելու, հատակը փոխելու, այդ նպատակով մշակույթի նախարարության հետ պայմանավորվածություն էր կայացել: Խնդիրը կարող է լուծվել նաեւ հովանավորների միջոցով:
Ա. Մադաթյանի խոսքերով՝ Նորայր Արզումանյանը դրան չի համաձայնվել, ասելով, որ թանգարանի ցուցանմուշները լավ պահպանելու համար հարկ է նախ եւ առաջ 10 մետրանոց պատ կառուցել, թանգարանի տարածքը ընդարձակել: Մադաթյանն ասաց, որ պատի կառուցումը խնդիրներ կառաջացնի, որովհետեւ թանգարանի կողքին սեփականաշնորհված կառույց է:
Գյուղապետը հավելեց, որ համայնքի սուղ բյուջեն հազիվ է բավարարում համայնքապետարանի աշխատողներին աշխատավարձ վճարելու համար, թանգարանի աշխատողի հաստիք չեն կարող պահել:
Ոսկան ՍԱՐԳՍՅԱՆ
