Ռազմավարական նախաձեռնությունների կենտրոնի Հոգաբարձուների խորհուրդը հաստատեց Հայաստանի տնտեսական և կառավարչական առանցքային ոլորտներում արագ և հիմնափոխ հաղթանակների ձեռք բերման Կենտրոնի տեսլականը՝ Հայաստանի Հանրապետության վարչապետ Կարեն Կարապետյանի Մոսկվա կատարած այցի ընթացքում տեղի ունեցած Ռազմավարական նախաձեռնությունների կենտրոնի Հոգաբարձուների խորհրդի աշխատանքային հանդիպման ընթացքում: Ռազմավարական նախաձեռնությունների կենտրոնի Հոգաբարձուների խորհրդի անդամները համաձայնել են միավորել իրենց ջանքերը ներկայացված գաղափարի շուրջ:
Արագ հաղթանակներն արդյունավետ, մեծ ֆինանսական և համակարգային փոփոխություններ չպահանջող, իրականացման սեղմ ժամկետներ ունեցող թիրախային ծրագրեր են, որոնց արդյունքում քաղաքացիների համար շոշափելի դրական տեղաշարժեր կլինեն՝ Կենտրոնի համար ներկայումս նախանշված թիրախային ոլորտներում, այն է՝ հանրային կառավարում, հարկային և մաքսային վարչարարություն, տեղեկատվական և բարձր տեխնոլոգիաներ, գյուղատնտեսություն և վերամշակում, կրթություն, զբոսաշրջություն: Կենտրոնն առաջիկայում կներկայացնի իր ռազմավարությունը՝ հիմնված արագ հաղթանակների տեսլականի վրա:
Միաժամանակ, Կենտրոնում մշակվում են հիմնարար ռազմավարական բարեփոխումներին ուղղած երկարաժամկետ ծրագրեր, որոնք ամուր հիմք կստեղծեն Հայաստանի կայուն և դինամիկ զարգացման համար:
Ռազմավարական նախաձեռնությունների կենտրոնի Հոգաբարձուների խորհուրդը բաղկացած է պետական և ոչ պետական ոլորտների ներկայացուցիչներից:
Կարդացեք նաև
Հոգաբարձուների խորհրդի ոչ պետական հատվածը ներառում է ներկայացուցիչներ գործարար և հասարակական ոլորտներից, ում գործունեության ուղղությունը միտված է դեպի Հայաստան, իսկ գործունեության աշխարհագրությունը տարածվում է Հայաստանի սահմաններից շատ ավելի հեռուն՝ Հայաստանից մինչև Ամերիկայի Միացյալ Նահանգներ և Արգենտինա, Ռուսաստանից մինչև Միացյալ Թագավորություն:
Ռազմավարական նախաձեռնությունների կենտրոնի տեղեկատվական բաժին
