Ջունգլի՝ Գեւորգ Սարգսյանի գործով նախաքննությունն ավարտվել է եւ գործն ուղարկվել է դատարան: Այսօր մեզ հետ զրույցում իրավապաշտպան Զարուհի Հովհաննիսյանը տեղեկացրեց, որ Ջունգլի կինը ամուսնու դեմ բողոքը հետ չի վերցրել, ինչպես սպասում էին շատերը:
Հիշեցնենք, որ ազատամարտիկ Վարդան Թումանյանին սպանելու մեջ մեղադրվող Ջունգլը Երեւանի փողոցներից մեկում ծեծի էր ենթարկել իր կնոջը, ինչին ականատես էր եղել եւ տեսանկարահանել էր Զարուհի Հովհաննիսյանը: Ջունգլը հիմա կալանքի տակ է:
Զարուհի Հովհաննիսյանն ասաց, որ ինքը գնացել է Ջունգլի հետ առերեսման, բայց Ջունգլը հրաժարվել է առերեսվել. «Գիտեմ, որ նա առերեսվել է իր կնոջ հետ, կինը պնդել է բողոքը: Հիմնականում ընտանեկան բռնության գործերում վախից բողոքը հետ են վերցնում, բայց այս դեպքում, միգուցե ազդել է նաեւ այն, որ իրավապաշտպան է ներգրաված այդ գործին: Նա դեռեւս չի դիմել մեզ՝ փաստաբան ունենալու խնդրանքով, ինքնուրույն է անցել գործընթացը եւ փայլուն է անցել: Դատաքննության փուլում, եթե կցանկանա փաստաբանի ներգրավում գործին, պատրաստ ենք նաեւ տրամադրել»:
Հռիփսիմե ՋԵԲԵՋՅԱՆ
