«Անձամբ ես հիշում եմ Վարդան Օսկանյանի ելույթն ԱԺ-ում «Մարտի 1-ի» գիշերը, երբ կաթոգին ու պաթոսով համոզում էր, որ Երեւանում արտակարգ դրություն հայտարարելը միակ ելքն է, որ բոլոր տեսակի մարդկանց կուտակումները ցրեն: Դա հենց ժողովրդի վրա կրակելու թույլտվություն էր, այսքանից հետո իրեն ընդդիմություն ներկայացնելը ուղղակի ծաղր է մեր հասարակությանը»,- Aravot.am-ի հետ զրույցում ասաց ավագանու անդամ Անահիտ Բախշյանը:
Հիշեցնենք, որ այսօր հրապարակվեց Վարդան Օսկանյանի հարցազրույցը, որի ընթացքում նա թվարկում էր այս ընտրություններին մասնակցելու իր ուժեղ կողմերը:
Մեջբերում ենք նրա ասածները. «Իմը դասական է, ես տասը տարի աշխատել եմ Քոչարյանի հետ, ձեռքբերումներ ունեմ, արդյունքներ եմ տվել, ավարտվել է իմ փուլը: Իշխանափոխություն է եղել, եղել են նոր մոտեցումներ, այդ պահից համարել եմ ինձ ոչ իշխանական քաղաքական գործիչ, այսինքն՝ ընդդիմության մեջ եմ եղել, ձգտում եմ իշխանության: Այդ ցիկլն անցել եմ: Դա իմ ուժեղ կողմն է, եւ ես հասարակությանը ներկայանում եմ հենց դրանով՝ իմ անցյալով ու իմ առաջարկելիք գաղափարներով»:
«Եթե պարոն Օսկանյանն իր ուժեղ կողմը համարում է իշխանության մեջ տասը տարի լինելն ու հետո որպես ընդդիմադիր՝ հասարակությանը ներկայանալը, եթե նկատի ունի որպես ԲՀԿ խմբակցության անդամ, ապա կասեմ, որ այդ քաղաքական ուժը, այդ խմբակցությունը երբեւիցե իրեն ընդդիմադիր չի հռչակել, եղել է անհասկանալի քաղաքական կատեգորիայում, այլընտրանք անունով մի կուսակցություն: Այդ անհասկանալի, որպես ընդդիմություն դեմք չունեցող, քաղաքական ուժի ներկայացուցիչն այսօր, եթե դա որպես իր ուժեղ կողմն է համարում, ապա, մեղմ ասած, ես այդ կարծիքին չեմ: Ես քաղաքագիտական կրթություն չունեմ, բայց հասկանում եմ՝ քաղաքականության մեջ, որ քաղաքական ուժն է ընդդիմադիր, որը՝ ոչ. ով որ հստակ հայտարարում է՝ ընդդիմություն է: Քաղաքագիտության մեջ այդ այլընտրանքայինը չկա:
Կարդացեք նաև
Վարդան Օսկանյանի օրոք ընդունվել են մադրիդյան սկզբունքները, ինքը եղել է դրա ակունքներում, եթե այդ փաստաթուղթը ներկայացնում է որպես Հայաստանի եւ Արցախի շահերից բխող փաստաթուղթ, ապա ինքն առավել, քան չի կարող իրեն ընդդիմադիր ներկայացնել»,- Վարդան Օսկանյանի ուժեղ կողմերի մասին հայտարարությանը անդրադարձավ Անահիտ Բախշյանը:
Արփինե ՍԻՄՈՆՅԱՆ
