«Շատ դժվար էր մարզական կարիերաս ավարտելու մասին որոշում կայացնելը, քանի որ իմ ամբողջ կյանքն անցել է պրոֆեսիոնալ սպորտում: Բայց գալիս է մի պահ, երբ ստիպված ես հեռանալ, երբ միշտ հաղթանակներով ես վերադարձել ու ուզում ես նույն եռանդով մարզվել, գոտեմարտել, բայց օրգանիզմդ արդեն չի ենթարկվում»:
Այսօրվա մամուլի ասուլիսն այս խոսքերով սկսեց հունահռոմեական ըմբիշ, լեգենդար Ռոման Ամոյանը: Ամոյանը երախտագիտությամբ հիշեց իր անձնական, հավաքականների մարզիչներին, ընկերներին, բոլոր նրանց, ովքեր ըմբշամարտում օգնել են իրեն՝ դառնալ այն, ինչ հիմա է:
Ամոյանը դեռ չի կողմնորոշվել, թե ինչով է զբաղվելու: Այժմ նա գերադասում է ամբողջ օրն անցկացնել ընտանիքի հետ: «Պրոֆեսիոնալ մարզիկն ամբողջությամբ մարզումների ու մրցումների մեջ է եւ իր անձնական կյանքով ու ընտանիքով զբաղվելու ժամանակ չի ունենում: Հիմա այդ բաց թողածը վերադարձնում եմ՝ վայելում եմ ընտանիքս, օրն անցկացնում երեխաներիս հետ», – ասաց նա:
Թե մարզչական աշխատանքով կզբաղվի՞, դեռ չգիտի: Բայց որ ըմբշամարտի հետ կապերը չի խզելու, միանշանակ է: Մարզչական աշխատանքի առաջարկ դեռ չի եղել, սակայն միանշանակ է, որ ինքը իր փորձն ու գիտելիքները հնարավորությունների առավելագույն չափով պատրաստ է փոխանցել աճող սերնդին: «Հաջողության հասնելու համար պետք է տքնաջան մարզվել, ինչպես ես եմ մարզվել, բայց գորգը իր գաղտնիքներն էլ ունի, որոնք ես գիտեմ: Ու այդ գաղտնիքները ես կփոխանցեմ պատանի ըմբիշներին», – վստահեցրեց Ռոման Ամոյանը:
Կարդացեք նաև
Աշոտ ՀԱԿՈԲՅԱՆ
