Հարցին, թե ճի՞շտ է, որ ով ինչ ուզի՝ կարող է ներկրել, Հայաստանի գործարարների միության նախագահ Արսեն Ղազարյանը պատասխանեց` այո, ով ինչ ուզում է՝ կարող է ներկրել. «Մաքսատունը շատ ազատական ռեժիմով է սկսել ներկրողների հետ աշխատել, որովհետեւ փաստաթղթերն ապահովված են, չարաբաստիկ 87 հոդվածով փաստաթղթային, մաքսային արժեքի ձեւակերպումն ու ներկրումները ազատ են: Մնում է գործարարների խիզախությունը»:
Այն հարցին, թե ինչ է, նախկինում կայի՞ն սահմանափակումներ, պարոն Ղազարյանն ասաց, որ չի կարող ասել, թե կային, բայց վարչարարությունն ավելի խիստ է եղել. «Վարչարարական գործընթացներում սուբյեկտիվ գործոնը մաքսատներում ավելի բարձր էր: Այսօր ավելի ազատականացվել է»:
Aravot.am-ի հարցին, թե ներկայումս գործարարները մասնավորապես ինչպիսի՞ խնդիրներ են բարձրացնում, պարոն Ղազարյանը չցանկացավ մանրամասնել` ասելով, որ այդ թեմայով ասուլիս կտա:
Հարցին, թե այս պահին Հյուսիս-հարավ ավտոճանապարհը ոչ նախատեսված ուղով է ընթանում, պարոն Ղազարյանը պատասխանեց, որ նախագծերը հաստատվել եւ մասնագետները, միջազգային խորհրդականները տվել են նման մոտեցում. «Թե ինչու են այդպես անում, դա արդեն իմ խնդիրը չէ»:
Կարդացեք նաև
Վարչապետի տված բազմաթիվ հանձնարարականներից հետո Արսեն Ղազարյանն ասաց, որ փոփոխություններ է տեսնում տեքստիլ արդյունաբերության, գյուղատնտեսական մթերքների վերամշակման ոլորտներում, որտեղ ներդրումների աշխուժացում է նկատել:
Պարոն Ղազարյանը նաեւ ասաց, որ առանց դրսից խոշոր ներդրումներ ներգրավելու հնարավոր չէ Հայաստանի տնտեսությունում էական աճ ապահովել:
Մանրամասները` տեսանյութում
Լուսինե ԲՈՒԴԱՂՅԱՆ
