Վարչապետ Կարեն Կարապետյանի այցը Մոսկվա թեեւ ընդգծված տնտեսական բնույթ ուներ`տեսանք եւ լսեցինք բազմաթիվ տնտեսական բնույթի պայմանավորվածությունների մասին, բայց կար նաեւ այցի քողարկված` քաղաքական բաղադրիչ: Այսօր «Սպուտնիկ Արմենիա» մամուլի ակումբում քաղտեխնոլոգ Վիգեն Հակոբյանն անդրադարձավ վարչապետի՝ Մոսկվա կատարած այցի եւ տնտեսական, եւ քաղաքական բաղադրիչներին:
Նա նկատեց, որ վերջին 10 տարիների ընթացքում ՀՀ վարչապետն առաջին անգամն էր պաշտոնական այցով Մոսկվայում: Սա, բանախոսի հավաստմամբ, ընդգծում էր այցը եւ այն, որ պաշտոնական Մոսկվան գնահատում է նոր վարչապետի անձի դերակատարումը ողջ գործընթացում. «Արարողակարգային բոլոր պայմանները պահվեցին, այցը լայնորեն լուսաբանվեց նաեւ ռուսական լրատվամիջոցներում»:
Այցի տնտեսական մասի գլխավոր ուղերձն, ըստ քաղտեխնոլոգի, Հայաստանում ներդրումների մթնոլորտի ապահովումն էր եւ այն, որ էլիտայում փոփոխություններ են լինելու:
Ի դեպ, երեկ վարչապետը հեռուստաընկերություններից մեկին տված հարցազրույցում էլ հայտարարեց, որ Հայաստանում էլիտայի փոփոխություն պետք է լինի, քանի որ այն երկրի ֆասադն է, իսկ ֆասադից հասարակությունը դժգոհ է:
Կարդացեք նաև
Քաղտեխնոլոգը առանձնացնում է հայ-ռուսական համատեղ ներդրումային հիմնադրամի ստեղծումը: Կարծում է, որ այն փաստը, որ հիմնադրամը պետական հիմունքներով է, հավելյալ երաշխիքներ է տալիս:
Երկրորդ կարեւոր դրվագը Վիգեն Հակոբյանը համարում է հայ գործարարների բավական ուշագրավ հայտարարությունն այն մասին, որ Սերժ Սարգսյանին եւ Կարեն Կարապետյանին հավատալով՝ գործարարները պատրաստ են ներդրումային ծրագրերին մասնակցել:
Եվ երրորդը`«Տաշիր» ընկերության սեփականատեր, ՌԴ-ում բնակվող հայ գործարար Սամվել Կարապետյանի հայտարարությունը եւ խոստումը, որ մի քանի ամսից մեծ ներդրումներ է անելու Լոռու մարզում:
Նա կարեւոր է համարում նաեւ ՌԴ քաղաքացիների համար Հայաստան մուտքը հեշտացնելու մասին պայմանավորվածությունը: ՌԴ քաղաքացիներն այլեւս ներքին անձնագրերով կարող են Հայաստան գալ: Բանախոսի կարծիքով՝ սա տուրիզմի զարգացման առումով Հայաստանին օգուտ կբերի:
Վիգեն Հակոբյանի տպավորությամբ, առաջիկայում Կարեն Կարապետյանը նմանատիպ այցեր կունենա նաեւ Իրան եւ ԱՄՆ:
Նելլի ԳՐԻԳՈՐՅԱՆ
