Հարցի պատասխանը նրա հայտարարության մեջ չկար,
ոչ էլ կուսակիցներն են ցանկանում մեկնաբանել
Երեկ նախկին վարչապետ Հովիկ Աբրահամյանը հայտարարություն էր տարածել: Ի հեճուկս բոլոր սպասելիքներ՝ Հովիկ Աբրահամյանի հայտարարության մեջ այդպես էլ չկար գլխավոր հարցի պատասխանը` ինչո՞ւ է նա հեռանում կուսակցությունից, որին նվիրել է իր կյանքի մոտ երկու տասնամյակ, եւ ի՞նչը իրեն ստիպեց կայացնել այդ, ինչպես ինքն էլ նկատել, դժվար որոշումը: Երեկ փորձեցինք Հովիկ Աբրահամյանի արդեն նախկին կուսակիցների հետ զրույցներում հասկանալ ՀՀԿ-ն լքելու նրա պատճառները: Ապարդյուն: ՀՀԿ-ականները կամ չէին արձագանքում հեռախոսազանգերին, կամ մտերմաբար հորդորում էին ազատել իրենց հարցերին պատասխանելու գործից, քանզի իրենք նույնպես ավելի շատ հարցեր ունեն, քան պատասխաններ: «Առավոտին», այնուհանդերձ, հաջողվեց որոշ հարցեր ուղղել ՀՀԿ ԳՄ անդամ, ԱԺ պատգամավոր Գագիկ Մինասյանին: Մեր զրուցակիցը եւս Հովիկ Աբրահամյանի հայտարարությունից չի հասկացել, թե վերջինս ինչո՞ւ է լքել ՀՀԿ-ն.
– Ինքն այդ մասին ոչինչ չասաց:
– Կուսակցական ընկերների հետ խոսակցություններ, քննարկումներ եղե՞լ են, գուցե գիտեք պատճառները:
Կարդացեք նաև
– Ոչ: Բայց ինքը պետք է ասի: Եթե կա պատճառ` ինքը պետք է ասի:
– Ձեր կարծիքով՝ ինչո՞ւ է պատճառների մասին լռում Հովիկ Աբրահամյանը:
– Նման հարց չի կարելի որեւէ մեկին տալ, քանի դեռ ինքն այդ մասին չի խոսել: Ինքը պետք է ասի:
– Հովիկ Աբրահամյանը նաեւ ասել է, որ մնում է քաղաքականության մեջ: Մամուլը գրում է, որ հավանական է «Ծառուկյան» դաշինքում լինի…
– Ինքը ի՞նչ է ասել: Ոչինչ: Բա ինչո՞ւ եք ինձ դրա մասին հարցնում:
– Վարչապետ Կարեն Կարապետյանն էլ ասել էր, որ եթե իրեն առաջարկվի ղեկավարել ՀՀԿ-ի նախընտրական շտաբը, ինքը կհրաժարվի: Փաստորեն, Կարեն Կարապետյանը չի՞ ցանկանում կուսակցական պատասխանատվության եւ պարտականությունների տակ մտնել:
– Իրեն պետք է հարցնել:
– Իսկ Ձեր կարծիքով՝ ՀՀԿ-ն եւ իշխանական բուրգը քանդվո՞ւմ են: Համենայնդեպս, ընդդիմադիրները նման հայտարարություն-կանխատեսումներ են անում:
– Ես կարծում եմ՝ արդեն տասը տարի այդ հայտարարությունները հնչում են:
– Ասում են այլ կարկառուն եւ փողատեր ՀՀԿ-ականներ էլ են պատրաստվում լքել կուսակցությունը:
– Ասում են ուռին աղջիկ է եղել… Թումանյան կարդացե՞լ եք: Դուք դրան հավատո՞ւմ եք: Ես նույնիսկ դրան չեմ հավատում:
– Ապրիլի 2-ին կայանալիք ընտրություններում «Ծառուկյան» դաշինքը ՀՀԿ-ի համար արժանի՞ հակառակորդ է լինելու:
– Ես կարծում եմ՝ բոլորն էլ մեզ համար արժանի են. նրանք, ովքեր հայտարարել են ընտրություններին մասնակցելու մասին, ովքեր դեռ չեն հայտարարել: Անարժան չկա:
– Առաջիկա օրերին հնարավո՞ր են այնպիսի ֆորս-մաժորային իրավիճակներ, որոնք կստիպեն նախագահ Սարգսյանին վաղաժամկետ վայր դնել լիազորությունները: Համենայնդեպս, փորձագետները չեն բացառում նման տարբերակը:
– Ես կարծում եմ՝ դրանք հիվանդ փորձագետներ են: Նրանցից հեռու մնացեք:
Միակ բանը, որ պարզ էր Հովիկ Աբրահամյանի հայտարարությունից, այն է, որ նախկին վարչապետը մնալու է քաղաքականության մեջ. «Ես հեռանում եմ ՀՀԿ-ից, բայց շարունակելու եմ ակտիվ զբաղվել քաղաքականությամբ, քանզի համոզված եմ, որ ունեմ բավարար ուժ, գիտելիքներ ու փորձ՝ ծառայելու մեր պետությանն ու ժողովրդին»: Հովիկ Աբրահամյանը, փաստորեն, համալրում է հայրենասերների շարքերը: Այն հայրենասերների, ովքեր, չգիտես ինչու, տարիներ շարունակ հարկեր չեն վճարել հանուն հայրենիքի բարգավաճման: Ավելին, առիթը բաց չեն թողել «յուղոտ պատառներն» իրենցով անելու:
Այսօր երեկոյան կայանալու են ՀՀԿ ԳՄ եւ խորհրդի նիստերը: Դրանցից հետո արդեն որոշ հարցերի պատասխաններ կհնչեն, եւ հնարավոր կլինի հստակ պատկերացումներ կազմել ՀՀԿ-ում վերադասավորումների մասին:
ՆԵԼԼԻ ԳՐԻԳՈՐՅԱՆ
«Առավոտ»
26.01.2017
