2017 թվականի հունվարի 16-ին Բարսելոնա քաղաքի հանրահայտ casa de libro -ում (գրքերի տուն) տեղի ունեցավ հայ բանաստեղծ, փիլիսոփայական գիտությունների դոկտոր Սլավի Ավիկ Հարությունյանի եռալեզու (իսպաներեն, անգլերեն, ֆրանսերեն) «Անթռչուն երկինք» գրքի շնորհանդեսը:
Գրքի խմբագիր, «Edicones Carena» հրատարակչության տնօրեն, իսպանացի անվանի բանաստեղծ Խոսե Մեմբրիվեն ընթերցողներին ներկայացնելով գիրքը` մասնավորապես անդրադարձավ հեղինակի ստեղծագործությունների գեղարվեստական համակարգին արդի եվրոպական պոեզիայի կտրվածքով, նշելով, որ «Սլավի Ավիկ Հարությունյանի պոեզիան այսօր Իսպանիայի եւ Եվրոպայի ամենաթարմ ու նորարարական ուղղություններից մեկն է` իր մետաֆորային ու կոմպոզիցիոն ինքնատիպ լուծումներով, բազմաշերտ կառույցով ու խորը զգացմունքային ու փիլիսոփայական հենքով»:
Խոսե Մեմբրիվեն միաժամանակ ընթերցողներին ներկայացրեց հայ բանաստեղծի հետ հրատարակչության հետագա ծրագրերը, որն ընդգրկում է մինչեւ 2020 թվականը Սերվանտեսի ինստիտուտի հետ համատեղ իրագործել հեղինակի նոր գրքերի տարածումը աշխարհի այլ լեզուներով:
Հեղինակի գրական ուղին իր զեկուցումով ներկայացրեց գրքի թարգմանչուհի Նարինե Այվազյանը: Մասնավորապես անդրադառնալով հայ, եվրոպացի գրաքննադատների կողմից տրված գնահատականներին:
Կարդացեք նաև
Ելույթ ունեցան նաեւ «Արարատ» հայկական մշակութային կենտրոնի տնօրեն Սարկիս Հակոբյանը, նույն կենտրոնի սաներն ու ուսուցիչները, ովքեր հայերեն, անգլերեն, ֆրանսերեն եւ իսպաներեն արտասանեցին Սլավի Ավիկ Հարությունյանի բանաստեղծությունները:
Շնորհանդեսի երկրորդ մասը անցավ հեղինակ -ընթերցող երկխոսություն ձեւաչափով:
ՀԵՆՐԻ ԱՌՈՒՇԱՆՅԱՆ
«Առավոտ»
25.01.2017
