Արաբկիր և Քանաքեռ-Զեյթուն Վարչական շրջանների ընդհանուր իրավասության դատարանն այսօր որոշեց եւս երկու ամսով երկարաձգել «Սասնա ծռեր» խմբի անդամ Արթուր Սողոմոնյանի խափանման միջոց կալանքը: Դատարանը մերժեց գրավի դիմաց Սողոմոնյանին ազատ արձակելու վերաբերյալ փաստաբանի միջնորդությունը:
Սողոմոնյանի պաշտպան՝ փաստաբան Մուշեղ Շուշանյանը Aravot.am-ին ասաց, որ իր պաշտպանյալը ներկա չի գտնվել դատական նիստին առողջական խնդիրների պատճառով. «Շուտով կլրանա վեց ամիսը, ինչ իմ պաշտպանյալը մաշկային հիվանդությամբ է տառապում ու պատշաճ բուժօգնություն նրան չի տրամադրվում քրեակատարողական հիմնարկում, տեւական ժամանակ է ադմինիստրացիայի հետ գրագրության մեջ ենք, բայց, ըստ էության, բուժօգնություն չեն տրամադրում, ինչի համար ինքը չէր կարող ներկայանալ դատական նիստին»:
Պարոն Շուշանյանը դատարանին ինքնաբացարկի միջնորդություն ներկայացնելն անիմաստ է համարում, ասաց՝ հայտարարել է, որ դատարանը անկողմնակալ ու անաչառ չէ, ինչպես նաեւ անկախ չէ, բայց. «Միաժամանակ անիմաստ ենք համարում ինքնաբացարկի միջնորդություն ներկայացնելը, քանի որ ելքը կանխորոշված է»:
Արփինե ՍԻՄՈՆՅԱՆ
