Հայաստանում Եվրամիության պատվիրակության ղեկավար Պյոտր Սվիտալսկին այսօր «Մեդիա կենտրոնում» ասաց, որ հավանաբար 2017-ին արդեն վերջնականապես կստորագրվի ԵՄ-ի հետ Շրջանակային կոնվենցիան. «Համագործակցության հանձնաժողովի նիստ տեղի ունեցավ Բրյուսելում եւ տեղի ունեցան բանակցությունների 6 շրջափուլեր, որը վերաբերում են շրջանակային նոր համաձայնագրի քաղաքական մասին: Փորձագետները մասնակցել են նաեւ Շրջանակային համաձայնագրի այլ դրույթների քննարկմանը»:
Արդյոք այդ բանակցությունների փուլը կարո՞ղ է լինել վերջնական՝ Պյոտր Սվիտալսկին պատասխանեց. «Ակնկալում ենք, որ այս դրական գործընթացը 2017-ին կպահպանվի եւ արդյունք կձեւավորվի: Հեռանկարը բավական լավատեսական է, շատ ծանր աշխատանք է իրականացվում, բանակցությունների վերջին փուլն է: Բանագնացները շատ մոտ են համաձայնագրի կնքմանը: Եթե ամեն ինչ լավ ընթանա, ապա բանակցությունը վերջնական տեսքի բերելն ու ավարտելը լուրջ իրադարձություն կլինի 2017-ին: Ակնկալում ենք, որ ավարտին կհասցվեն գործընկերության առաջնահերթությունների ձեւակերպումները»:
Ըստ նրա, այս կարեւոր փաստաթղթերը՝ սկսած Շրջանակային փաստաթղթից, կարող են նոր որակ հաղորդել. «ԵՄ-ի համար կա 5 գերակա ուղղություն՝ ընտրական գործընթացը, բավականին լուրջ աջակցություն գումարի տեսքով ԵՄ-ն արդեն հատկացրել է, երկրորդ՝ ցանկանում ենք մեր քննարկումները շարունակել ՀՀ-ում բիզնես միջավայրի բարելավման ուղղությամբ՝ նոր կառավարության արած հայտարարությունների հիման վրա, երրորդ գերակա ուղղությունը մնալու է համագործակցությունը եւ աջակցությունը՝ կոռուպցիայի դեմ պայքարի ուղղությամբ, ԵՄ-ն հատկացրել է ավելի քան 15 մլն եվրո՝ ՀՀ-ում կոռուպցիայի դեմ պայքարի ուղղությամբ եւ աշխատելու ենք, որ բնակչությանը տեսանելի լինեն արդյունքները:
Հաջորդ ուղղությունն է մարդու իրավունքների հետ կապված բյուջետային օժանդակության պայմանագրի իրականացումը, եւ 5-րդ կարեւոր ուղղությունն է, որ քննարկենք, թե ինչպես ամրապնդենք պետական համակարգի անկախությունը: ԵՄ-ն դատական համակարգի անկախության համար ավելի քան 15 մլն եվրո է հատկացրել, ավելի քան 10 մլն-ի էլ նոր պայմանագիր է ստորագրել»:
Կարդացեք նաև
Հարցին՝ որո՞նք են այն խոչընդոտները, որ հենց վաղը Շրջանակային կոնվենցիան չի ստորագրվում, հայկական կողմի՞ց են այդ խոչընդոտները ստեղծվում՝ Պյոտր Սվիտալսկին պատասխանեց. «ԵՄ չափանիշներով Շրջանակային կոնվենցիայի բանակցությունների տեմպը շատ բարձր է եղել եւ շատ կառուցողական: Սովորաբար նմանատիպ երկկողմ բանակցությունները ավելի երկար են տեւում: Միգուցե հայկական դիտանկյունից այլ տպավորություն է, բայց ԵՄ-ի դիտանկյունից այս բանակցությունները շատ արագընթաց են՝ հաշվի առնելով հանդիպումների հաճախությունը, երկխոսության տեմպը՝ ճեպընթաց է եղել: Դեռեւս չլուծված են որոշ խնդիրներ, որոնք քաղաքականապես այդքան դժվար լուծելի կամ կասկածելի չեն: Մենք կասկածի տակ չենք առնում այդ հարցերի լուծելիությունը՝ խելամիտ ժամկետում: Գործադրվող ջանքերը շատ լուրջ են, կառուցողական եւ անկեղծ»:
Նա հիշեցրեց, որ ԵՄ-ի հետ համաձայնագիրը ստորագրելիս խնդիրները կապված են եղել ԵՏՄ-ին ՀՀ-ի անդամակցության հետ, իսկ հիմա որեւէ խնդիր չկա եւ Պյոտր Սվիտալսկին կասկած անգամ չունի, որ Շրջանակային կոնվենցիան կստորագրվի:
Հռիփսիմե ՋԵԲԵՋՅԱՆ
