Այսօր Ստրասբուրգում մեկնարկած Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանին հայկական պատվիրակության անդամներից չեն մասնակցում ՀԱԿ խմբակցության ղեկավար Լևոն Զուրաբյանը և ՕԵԿ խմբակցությունից Մհեր Շահգելդյանը:
Aravot.am-ի հետ զրույցում Ստրասբուրգից ԵԽԽՎ հայկական պատվիրակության անդամ, ՀՀԿ խմբակցության պատգամավոր Սամվել Ֆարմանյանը տեղեկացրեց, որ ձմեռային նստաշրջանին հայկական պատվիրակության անդամներից միայն երկուսը չեն մասնակցում` Լևոն Զուրաբյանն ու Մհեր Շահգելդյանը:
Հիշեցնենք` տեղեկություններ կային, որ հնարավոր է Նաիրա Զոհրաբյանը, Միքայել Մելքումյանը, Լևոն Զուրաբյանը, Մհեր Շահգելդյանն ու Արմեն Ռուստամյանը չմասնակցեն ձմեռային նստաշրջանին` ապրիլին կայանալիք խորհրդարանական ընտրությունների կազմակերպչական հարցերով զբաղված լինելու պատճառով:
ԵԽԽՎ Եվրոպայի ժողովրդական կուսակցության (ԵԺԿ) քաղաքական խումբն այսօր քննարկել է ԵԺԿ խմբի նախկին նախագահ, իտալացի Լուկա Վոլոնտեին` Միլանի դատախազության կողմից առաջադրված մեղադրանքը՝ Ադրբեջանից կաշառք ստանալու մասին։ Պնդումն է՝ ԵԽԽՎ-ն պետք է հատուկ զեկուզող-հետաքննիչ նշանակի այդ հարցով, ով կարճ ժամկետում ԵԽԽՎ-ին զեկուցի կոռուպցիոն այդ սկանդալի մասին, ինչը կասկածի տակ է դրել ԵԺԿ-ի հեղինակությունը ողջ Եվրոպայում:
Կարդացեք նաև
Պարոն Ֆարմանյանից հետաքրքրվեցինք` զեկուցող նշանակել-չնշանակելու հարցը ե՞րբ պարզ կլինի, նա տեղեկացրեց, որ չորեքշաբթի:
Իսկ ԵԽԽՎ Մարդու իրավունքների և իրավական հարցերի հանձնաժողովում քննարկվեց Ադրբեջանի կողմից քաղբանտարկյալ Իլգար Մամմադովի վերաբերյալ՝ Մարդու իրավունքների եվրոպական դատարանի որոշման չկատարման խնդիրը։Որոշում ընդունվեց. միավորելով ջանքերը ԵԽ գլխավոր քարտուղար Թյորբորն Յագլանդի և Նախարարների կոմիտեի հետ` հանձնաժողովը մարտի սկզբին հատուկ առաքելություն գործուղի Բաքու՝ ադրբեջանական իշխանություններին գրավոր փոխանցելու հանձնաժողովի խորը մտահոգությունը ՄԻԵԴ-ի չկատարման վերաբերյալ:
Մեր այն դիտարկմանը, թե, այնուամենայնիվ, վեհաժողովը չընդունեց առաջարկը հատուկ ընթացակարգով քննարկել Թուրքիայում ժողովրդավարական հաստատությունների գործունեությունը և ընդհանրապես այդ երկրում իրավիճակը, սա արդյոք ադրբեջանաթուրքական լոբբիի արդյո՞ւնք չէ, պարոն Ֆարմանյանը պատասխանեց. «Նման բան չկա, ուղղակի քննարկման համար առաջադրված տարբեր այլ հարցեր էլ կային, ուստի մեծամասնությունը նախապատվությունը տվեց մյուսներին: ԵԽԽՎ-ում մեծ մտահոգություն կա Թուրքիայում զարգացումների վերաբերյալ, և մի քանի ամիս առաջ հատուկ ընթացակարգով քննարկում կազմակերպվեց այդ թեմայով: Հիմա որոշում կայացվեց այլ թեմաների նախապատվություն տալ»:
Տաթև ՀԱՐՈՒԹՅՈՒՆՅԱՆ
