Քիչ առաջ Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանի լիագումար նիստում իր ելույթի ընթացքում ԵԽԽՎ նախագահ Պեդրո Ագրամունտը, անդրադառնալով կառույցի առաջ ծառացած մարտահրավերներին, նշեց նաև ապրիլյան քառօրյա պատերազմը: Նա մասնավորապես հայտարարեց. «2016-ի ապրիլին ղարաբաղաադրբեջանական սահմանին տեղի ունեցան ռազմական գործողություններ: Սա մարտահրավեր է, որը մինչև այժմ մենք չենք լուծել: Իմ և վեհաժողովի համոզումն է, որ հակամարտությունը չի կարելի լուծել ռազմական ճանապարհով, իսկ մեր դերը` որպես խորհրդարանական վեհաժողով, կարևոր է: Մեր վեհաժողովը պետք է կարողանա օգտագործել իրեն վերապահված հնարավորությունները»:
Այս համատեքստում Պեդրո Ագրամունտը մտահոգություն հայտնեց, թե վեհաժողովի աշխատանքներին արդեն երկու տարի չի մասնակցում Ռուսաստանի պատվիրակությունը. «Եթե մեկ անդամ երկիր չի մասնակցում վեհաժողովի աշխատանքներին, դա արդեն լուրջ խնդիր է»:
Անդրադառնալով իր տրամադրվածությանը` ԵԽԽՎ նախագահը վստահեցրեց, որ շարունակելու է իր աշխատանքը, որպեսզի հնարավոր լինի «տուպիկից դուրս գալ»:
Պեդրո Ագրամունտը մարտահրավեր համարեց նաև Թուրքիայում և Ադրբեջանում խորհրդարանականների, մարդու իրավունքների պաշտպանությամբ զբաղվող գործիչների և քաղաքացիական հասարակության ներկայացուցիչների ազատազրկումը:
Կարդացեք նաև
Վեհաժողովին առաջարկ էր ներկայացվել արագացված կարգով քննարկել Թուրքիայում ժողովրդավարական ինստիտուտների գործունեությունը և իրավիճակը Թուրքիայում:
Քվեարկության ընթացքում 2/3-ը չապահովվեց, ուստի քվեարկությունը չկայացավ և քննարկումը հետաձգվեց:
Նշենք, որ ԵԽԽՎ ձմեռային լիագումար նստաշրջանի օրակարգում ընդգրկված են քննարկումներ լրագրողների դեմ հարձակումների և Եվրոպայում ԶԼՄ-ների ազատության, առցանց ԶԼՄ-ների և լրագրության մարտահրավերների ու պատասխանատվության, կիբեր-խտրականության և առցանց ատելության խոսքին վերջ դնելու անհրաժեշտության թեմաներով:
Հրատապ քննարկումներ կանցկացվի Սիրիայում տիրող իրավիճակի և հարևան երկրների վրա դրա թողած ազդեցության հարցերով:
Վեհաժողովին կհյուրընկալվեն Կիպրոսի նախագահ Նիկոս Անաստասիադեսը, Ռումինիայի նախագահ Իոհաննիս Կլաուսը, Եվրոպական հանձնաժողովի Եվրոպական հարևանության քաղաքականության և ընդլայնման բանակցությունների հարցերով հանձնակատար Յոհանես Հանը:
Տաթև ՀԱՐՈՒԹՅՈՒՆՅԱՆ
