«Գազի էժանացման գործոններից մեկը տարանցման գնի փոփոխությունն էր: Մենք հաշվարկել ենք, թե ինչ խնայողություն ենք ունենալու այս բանակցությունների արդյունքում եւ խնայողության այդ մասը հաշվարկել ենք արդեն գործող սակագնում»,-ասաց Էներգետիկ ենթակառուցվածքների եւ բնական պաշարների փոխնախարար Հայկ Հարությունյանը՝ պատասխանելով գազի էժանացմանը վերաբերող հարցին, սակայն փոխնախարարը չասաց, թե որքան խնայողություն են ունեցել, քանի որ այն կախված կլինի ծավալներից:
Այլ մանրամասներ պարոն Հարությունյանը չներկայացրեց` ասելով, որ երկու առեւտրային ընկերությունների պայմանավորվածություն է:
Այսօր «Արմենպրես» մամուլի սրահում Հայկ Հարությունյանը տեղեկացրեց, որ հունվարի 25-27-ը Երեւանում տեղի կունենա «Էներգետիկայի շաբաթ 2017», որի նպատակն է ներկայացնել Հայաստանում էներգախնայողության եւ վերականգնվող էներգետիկայի ոլորտում վերջին զարգացումները, հիմնախնդիրներն ու ներդրումների հնարավորությունները: Միջոցառումներից մեկը լինելու է Արեւային էներգետիկայի ներդրումային համաժողովը:
Անդրադառնալով վթարային անջատման հետեւանքով ՀԱԷԿ-ի 110 ԿՎ առաջին հաղորդաձողերի դիֆերենցիալ պաշտպանության աշխատանքին, փոխնախարարն ասաց, որ այն ատոմակայանի խնդիրը չի եղել, այլ` բարձրավոլտ էլեկտրակայանների ցանցերում առաջացած խնդիր, որի պատճառը կուտակված սառույցներն էին:
Կարդացեք նաև
Ըստ նրա, ատոմակայանը ոչ մի խնդիր չունի:
ՀԱԷԿ-ի նոր էներգաբլոկի վերաբերյալ էլ պարոն Հարությունյանն ասաց, որ այն նախատեսվածից ավելի քիչ հզորությամբ է կառուցվելու, քանի որ այդպես ավելի արդյունավետ է եւ քիչ ծախսատար:
«Նաիրիտի» վերագործարկման հարցին ի պատասխան էլ փոխնախարարն ասաց, որ տեղյակ չէ, քանի որ ինքը չի կոորդինացնում այդ ոլորտը եւ ներդրողից էլ տեղյակ չէ:
Լուսինե ԲՈՒԴԱՂՅԱՆ
