Էրեբունի եւ Նուբարաշեն վարչական շրջանների ընդհանուր իրավասության առաջին ատյանի դատարանում այս պահին շարունակվում է ՊՊԾ գնդի գրավմանը հաջորդած օրերին Սարի թաղում ոստիկանների եւ քաղաքացիների միջեւ բախումների գործի քննությունը:
Շարունակվեց գործով տուժած ճանաչված ոստիկաններից Հովսեփյանի հարցաքննությունը: Տուժողը պնդեց նախորդ նիստում ասածը՝ քաղաքացիները ձեռքերով, ոտքերով, քարերով եւ այլ առարկաներով հարվածել են ոստիկաններին:
Դատախազը հետաքրքրվեց՝ արդյոք քաղաքացիները ոչ սթափ վիճակո՞ւմ են եղել: «Կոնկրետ չեմ հիշում, բայց խմիչքի հոտը գալիս էր»,-այսպես պատասխանեց տուժող ոստիկանը, ինչն առաջացրեց նիստին ներկաների՝ մեղադրյալների հարազատների ծիծաղը:
Կարդացեք նաև
Պաշտպաններից մեկը հետաքրքրվեց՝ ինչի՞ց ենթադրեցիք, որ խմիչքի հոտը քաղաքացիների վրայից էր գալիս: Ոստիկանը հիմնավորեց, որ ոստիկանները ծառայության ընթացքում իրավունք չունեն ալկոհոլ օգտագործել: Մեղադրյալներից երկուսի պաշտպան Լիպարիտ Սիմոնյանը հակադարձեց՝ «իրավունք չունի, բայց կարո՞ղ է, չէ՞, հո բերանը կարա՞ծ չի»:
Ապա տուժողը պնդեց՝ եթե ոստիկանները կրակոցներ չարձակեին, քաղաքացիները չէին դադարեցնի բռնությունը. «Շատ բռնկված իրավիճակ էր: Կրակոցի ձայնը որ լսեցին՝ հանդարտվեցին»:
Հարցաքննության ընթացքում Լիպարիտ Սիմոնյանի նյարդերը տեղի տվեցին: Նա բղավեց, որ տուժող ոստիկանը մեղադրողի եւ պաշտպանների հարցերին տարբեր պատասխաններ է տալիս՝ ասելով միայն այն, ինչ դատախազն է իր հարցերով հուշում: «Պետք չի անմեղ մարդկանց վրա «բոչկա գլորել» դատարանում: Ես չեմ հասկանում՝ սա ի՞նչ է: Վերջին հաշվով ոստիկան եք, Ձեր ոստիկանապետն ամեն օր ասում է ոստիկանության դերի բարձրացման մասին, մինչդեռ զրոյի եք հասցնում այդ ձերը ձեր պատասխաններով»,-ասաց Լիպարիտ Սիմոնյանը: Դատախազն էլ իր հերթին հորդորեց դատախազության հասցեին նման կերպ չարտահայտվել:
Պաշտպաններն առարկեցին՝ տուժող Հովսեփյանը «ոչինչ չի հիշում», երբ իրենք են հարցեր ուղղում, մինչդեռ դատախազի հարցերի դեպքում նրա հիշողությունը «լուսավորվում է»:
Այս գործով պետք է հարցաքննվեն այլ ոստիկաններ եւս: Հավելենք, որ դատարանի որոշմամբ լրատվամիջոցներին թույլատրվել է նկարահանել նիստի միայն առաջին տասը րոպեն:
Լուիզա ՍՈՒՔԻԱՍՅԱՆ
