Այսօր Կենտրոն եւ Նորք Մարաշ վարչական շրջանների ընդհանուր իրավասության դատարանում «Էլեկտրիկ Երեւանի» շարժման ժամանակ տուժած լրագրողներն ընդդեմ ոստիկանության գործի դատական նիստին որպես վկա հարցաքննվեց Armday եւ Araratnews կայքերի լրագրող Փայլակ Ֆահրադյանը:
Նա ասաց, որ 2015-ի հունիսի 23-ին վաղ առավոտյան եղել է Բաղրամյան պողոտայում. «Կար Լեւոն Երանոսյանը, Աշոտ Կարապետյանը, ով հիմա ոստիկանության համակարգում չի: Մեզ հրահանգվեց աջ կամ ձախ հատվածում հավաքվել, որովհետեւ իրենք պատրաստվում էին հատուկ գործողություններ ձեռնարկել: Հետո, երբ ջրցան մեքենան գործի դրվեց, ոստիկանները սկսեցին ցուցարարներին բռնի ուժով բերման ենթարկել»:
Կարդացեք նաև
Նա պատմեց, թե ինչպես է Աշոտ Կարապետյանը հրահանգել իրեն հեռացնել դեպքի վայրից. «Ոստիկանները դրանից հետո ինձ բռնի ուժով բերման էին ենթարկել ոստիկանության բաժին»: Աշոտ Կարապետյանի խոսքերը նաեւ տեսագրվել են: Փայլակ Ֆահրադյանը վստահեցրեց, որ ոստիկանները հրահանգներ էին տալիս պարբերաբար:
Հարցին՝ լսե՞լ եք, որ փոխոստիկանապետ Լեւոն Երանոսյանն ասի՝ լրագրողներին խոչընդոտեք, հանձնարարի, թե մի թողեք ձայնագրեն եւ այլն՝ նա պատասխանեց, որ անձամբ չի լսել, բայց գործընկերներն են պատմել որոշ բաներ: Օրինակ, նա նշեց, որ «Ազատության» լրագրող Հովհաննես Մովսիսյանը պատմել է, թե ինչպես է Լեւոն Երանոսյանը հարվածել իր ձեռքին:
Մեղադրող դատախազը ճշտեց՝ հաստա՞տ «հարվածել է» ասել Հովհաննես Մովսիսյանը, որովհետեւ նա քիչ առաջ դատարանում ցուցմունք տալուց ասաց, որ Երանոսյանը բռնել է ձեռքից, ոչ թե հարվածել: Փայլակ Ֆահրադյանը պատասխանեց. «Այսինքն, դուք կարծում եք, որ Լեւոն Երանոսյանը բռնել է ձեռքը շոյելու նպատակո՞վ»: Լրագրողի պատասխանը հարուցեց դատարանում ներկաների ծիծաղը: Ըստ Փայլակ Ֆահրադյանի, որեւէ հակասություն չկա իր եւ Հովհաննես Մովսիսյանի ասածի միջեւ:
Հռիփսիմե ՋԵԲԵՋՅԱՆ
