Այսօր «Բլից ինֆո» ակումբում Razm.info կայքի վերլուծաբանները, խոսելով ահաբեկչական խմբավորումներում կովկասյան տարածաշրջանից մասնակցության մասին, ասացին, որ լուրջ դերակատարում այդտեղ ունեն հատկապես Ադրբեջանի քաղաքացիները:
Տարոն Հովհաննիսյանն ասաց, որ Ադրբեջանի միգրացիայի ծառայության տվյալներով՝ 2016-ի ընթացքում Ադրբեջանի 58 քաղաքացու զրկել են քաղաքացիությունից՝ ահաբեկչական խմբավորումներում մասնակցության մեղադրանքով. «Իրականում, եթե վերլուծենք սակավ տվյալները, միայն դիտարկենք 2013-2014-ին սպանված ադրբեջանցի զինյալների թիվը, որը մոտ 100-150 էր, տվյալները շատ ավելի շատ են, քան այդ 58-ը, որ նշվում է: Ադրբեջանից ահագին շատ ահաբեկիչներ կան Իսլամական պետություն խմբավորման կազմում, կան նաեւ ահաբեկչական այլ խմբավորումներում եւ այդ թվերը դուրս են մնում վիճակագրական տվյալներից»:
Տարոն Հովհաննիսյանն ասաց՝ միտումներ են նկատվում, որ նրանցից ոմանք վերադառնում են. «Սիրիայում վերջին շրջանում ահաբեկչական խմբավորումները իրենց դիրքերը զիջում են եւ վտանգ կա, որ նրանք կարող են վերադառնալ իրենց երկրներ: Ադրբեջանի պարագայում էլ կարող են վերադառնալ եւ դա ապակայունացման կտանի»:
Կարդացեք նաև
Վլադ Վարդանյանի խոսքերով՝ վրացիները նույնպես ակտիվ մասնակցում են այդ խմբավորումներում:
Հռիփսիմե ՋԵԲԵՋՅԱՆ
