Արթիկում «Սաստեքս» տեքստիլ ֆաբրիկայի կարի ուսուցման կենտրոնը բացելու ժամանակ մեծ թվով արթիկցիներ հավաքվել էին իրադարձության վայրում: Մենք հավաքվածներից մեկին՝ ազատամարտիկ Սուրեն Մովսիսյանին հարցրեցինք, թե 350-400 աշխատատեղերի բացումը ինչ-որ չափով կկասեցնի՞ արտագաղթը Արթիկից, հույսեր կապո՞ւմ են այս ֆաբրիկայի հետ: «Էդ ինչքան փող պիտի տան, որ ես ապրեմ էստեղ, Հայաստան պետությունում փող չեն տալիս, որ ժողովուրդն ապրի, կոպեկներ են տալիս: Արցախյան պատերազմից հետո ես 15 տարի է՝ խոպան եմ գնում-գալիս, Շուշիի ազատագրմանն եմ մասնակցել, վետերան եմ, Մոսկվա եմ գնում աշխատելու շինարարության վրա, էլ ճար չունեմ: Մոսկվայում ինձ նորմալ են վճարում, համենայնդեպս այնքան վճարում են, որ ընտանիք պահեմ»,- ասաց մեր զրուցակիցը:
Մեր հարցին՝ հայրենիքում ձեզ՝ որպես Շուշիի ազատագրմանը մասնակցած ազատամարտիկի աշխատանքի որեւէ առաջարկ չի՞ եղել, Սուրեն Մովսիսյանը պատասխանեց. «Ոչ, ազատամարտիկներին առաջարկ չեն անում, ուր մնաց այստեղ հավաքված խեղճ ու կրակ ժողովրդին: Ես ինքս հետաքրքրվել եմ, փորձել եմ ինչ-որ աշխատանք փնտրել հայրենիքում, բայց գործ չեն տալիս, ասում են չկա, ծանոթ է, մանոթ է, էս է, էն է…Իրենք իրենցով տեղ են անում ու աշխատում»:
Մեր հարցին՝ ի՞նչ պիտի փոխվի մեր երկրում, որ չգնաք արտագնա աշխատանքի, ազատամարտիկն ասաց. «Դուք ինձանից լավ գիտեք ով պիտի փոխվի այս երկրում, որ ժողովուրդը կարողանա ապրել»: Դիտարկմանը, թե շուտով ԱԺ ընտրություններ են, նոր կառավարություն է ձեւավորվելու, դրական փոփոխության հույս չե՞ք կապում, մեր զրուցակիցն ասաց. «Ես Դաշնակցական եմ, կընտրեմ իմ կուսակցությանը ԱԺ ընտրությունների ժամանակ, բայց հույս չունեմ, որ լավ կլինի, լավ կլինի մեր մեռնելուց հետո: Ես Շուշիի ազատագրմանն անմիջապես մասնակից եմ եղել, մեր մարզից եղել են վեց հոգի, վեց հոգուց հինգը խոպան են գնում, մեզանից միայն նախկին մարզպետ Ռոմիկ Մանուկյանն է այստեղ»:
Մեր դիտարկմանը, թե արցախյան քառօրյա պատերազմի ժամանակ ՌԴ-ում գտնվող մեր հայրենակիցներից շատերը պատրաստակամություն հայտնեցին գալ հայրենիքի պաշտպանությանը մասնակցելու, ազատամարտիկն ասաց. «Շատ-շատերս հավաքվել էինք, որ գայինք հայրենիք, բայց դադարեցրեցին, չեկանք: Էդ նույն ազատամարտիկները մեծ հաճույքով կգային կռվելու, ու նորից ետ դառնալու, եթե չզոհվեին»:
Կարդացեք նաև
Նունե ԱՐԵՎՇԱՏՅԱՆ
