2016թ. քառօրյա պատերազմում՝ ապրիլի 1-4-ը թշնամու գնդակից զոհվեցին 100-ից ավելի զինվորներ, հաշմանդամ դարձան շուրջ 150-ը, չհաշված հեկտարներով տարածքների կորուստը և նյութական վնասները:
Եվ ահա այսօր օրվա իշխանությունը ձեռնարկում է իր հերթական վերարտադրությունը:
Ապրիլի 2-ին նշանակված է ԱԺ-ի ընտրությունների օր:
Քառօրյա պատերազմում զոհվածների ծնողներն ու հարազատները այդ օրերին կգնան գերեզմանատուն՝ իրենց զավակների մահվան տարին հիշատակելու համար: Դժվար թե նրանք սիրտ ունենան այցելելու ընտրատեղամաս և քվե տալու որևէ մեկին:
Կարդացեք նաև
Ի դեպ, ապրիլի 2-ին ԿԸՀ-ի արդյունքների ամփոփումից հետո վերարտադրված իշխանությունը 7 օր 7 գիշեր կնշի ընտրություններում իր հաղթանակը՝ մոռանալով ոչ միայն հանրապետությունում առկա սոցիալական վիճակը՝ բևեռացումը, այլ ամենից կարևորը՝ քառօրյա պատերազմում զոհերի հիշատակի տարին:
Պարոնա՛յք բարձրագույն իշխանություն, սահմանադրական բարեփոխումները, ավելի ստույգ նոր սահմանադրության հանրաքվեն կազմակերպեցիք 2015թ. դեկտեմբերի 6-ին և հանրաքվեի հաջող արդյունքների համար հաջորդ օրը բաժակ բարձրացրեցիք, մոռանալով դեկտեմբերի 7-ը՝ Սպիտակի երկրաշարժի օրը:
Այս անգամ ևս բաժակ եք բարձրացնելու և նշելու հերթական հաղթանակը ընտրություններում:
Իրոք որ քաղաքականությունը բարոյականության հետ աղերս չունի:
Գառնիկ Վաղարշակյան
Հայաստանի բուհերի արհեստակցական
կազմակերպությունների ճյուղային
հանրապետական միության նախագահ
