Հիշեցնենք, որ պատասխանելով ադրբեջանցի լրագրողի այն հարցին, թե արդյոք Ռուսաստանը կմիջամտի՞ Ադրբեջանի «ներքին գործերին», եթե վերջինս փորձի «զտումներ անցկացնել Լեռնային Ղարաբաղում և այն մաքրել ահաբեկչական և այլ քրեական տարրերից», Սերգեյ Լավրովը պատասխանել էր. «Դա բացառապես Ադրբեջանի ներքին գործերի խնդիրը չէ: Լեռնային Ղարաբաղի հակամարտության հարցում գոյություն ունի որոշումների ամբողջ փաթեթ, առաջին հերթին այն որոշումները, որոնք ընդունվել են ՄԱԿ-ի Անվտանգության խորհրդում հակամարտության ամենաթեժ պահին և պահանջում էին կրակի դադարեցում: Եթե հետաքրքրվում եք, կարող եք նայել արխիվները և տեսնել՝ ինչպես են կրակի անհապաղ դադարեցման մասին այդ պահանջները պահպանվել, ում կողմից են պահպանվել, ում կողմից՝ ոչ:
Մեկնաբանելով Լավրովի հայտարարությունները՝ «Զարկերակ» մամուլի ակումբում պարոն Մինասյանն ասաց. «Իրականում դա կարելի է մեկնաբանել որպես ԵԱՀԿ Մինսկի խմբի համանախագահ երկրի ԱԳ նախարարի հայտարարություն, որը պարունակում է ՄԽ գործունեության և մադրիդյան սկզբունքների ավելի համապարփակ ինչ-որ վերլուծություն: Կարևոր է այն հանգամանքը, որ Լավրովն, ինչպես նաև բոլոր համանախագահները, այս կամ այն ձևով բազմիցս նշել են, որ բոլոր կետերն իրար հետ կապված են, և կլինի դա տարածքների, փախստականների կամ որևէ այլ բաղադրիչ, կարող է լուծվել, միայն եթե Ղարաբաղի վերջնական կարգավիճակի հարց լուծվի»:
Ըստ Սերգեյ Մինասյանի՝ հերթական անգամ Լավրովի կողմից արձանագրվեց այն հանգամանքը, որ ՌԴ-ն և Մինսկի խմբի համանախագահները դեմ են հակամարտության ուժային լուծման փորձին:
Անդրադառնալով ՌԴ ԱԳ նախարարի՝ Մինսկում ձերբակալված բլոգեր Ալեքսանդր Լապշինին Ադրբեջան արտահանձնելուն դեմ լինելուն՝ Սերգեյ Մինասյանը դա բնութագրեց այսպես. «Սերգեյ Լավրովի հայտարարությունը շոկային իրավիճակ ստեղծեց Ադրբեջանում և հասարակական-լրատվական դաշտում»:
Կարդացեք նաև
Տաթև ՀԱՐՈՒԹՅՈՒՆՅԱՆ
