Վարչական դատարանում այսօր դատավոր Լիանա Հակոբյանի նախագահությամբ տեղի ունեցավ «ոստիկանությունն ընդդեմ Հիմնադիր խորհրդարանի անդամ Հովհաննես Ղազարյանի» գործով նիստը, որին կողմերը չէին ներկայացել:
Հիշեցնենք, որ ՀՀ ոստիկանությունը դատարան պահանջ էր ներկայացրել՝ Ղազարյանին պատասխանատվության ենթարկել Վարչական իրավախախտումների վերաբերյալ օրենսգրքի 180.1-րդ հոդվածի 11-րդ եւ 15-րդ կետերի պահանջներով, այն է` հավաքի մասնակցի կողմից օրենքով սահմանված իր պարտականությունները չկատարելը եւ հավաքի խաղաղ եւ բնականոն ընթացքի ապահովման վերաբերյալ ոստիկանության` օրենքով սահմանված պահանջները չկատարելը:
Նիստի ընթացքում դատավորը տեղեկացրեց, որ հայցվոր կողմը, տվյալ դեպքում՝ ՀՀ ոստիկանությունը, հայցից հրաժարվելու դիմում է ներկայացրել: Դատարանը գտավ, որ առկա է գործի վարույթը կարճելու հիմք եւ գործի վարույթը կարճելու որոշում կայացրեց:
Հիշեցնենք, որ «Նոր Հայաստան» շարժման անդամ Գեւորգ Սաֆարյանի կալանքի երկարաձգմանն ընդառաջ՝ մարտի 24-ին, Ղազարյանը մասնակցել էր ցույցի: Ցույցի ընթացքում մասնակիցները պառկել էին Մաշտոցի պողոտայում եւ շղթայել էին իրենց: Բերման են ենթարկվել տասնյակ քաղաքացիներ, այդ թվում՝ Հովհաննես Ղազարյանը:
Լուիզա ՍՈՒՔԻԱՍՅԱՆ
