Հունվարի 18-ին ԼՂՀ Ազգային ժողովում տեղի է ունեցել խորհրդարանի նախագահ Աշոտ Ղուլյանի տարեկան ամփոփիչ մամուլի ասուլիսը:
Ասուլիսի մեկնարկին Աշոտ Ղուլյանը բնորոշելով անցած տարին` նշել է. «Տարին բարդ էր, փորձություններով լեցուն, նաև հարուստ՝ քաղաքական նշանակալի իրադարձություններով», – նշել է ԱԺ նախագահը:
Այդ համատեքստում Աշոտ Ղուլյանն առանձնացրել է մի շարք կարևոր իրադարձություններ՝ Սահմանադրական բարեփոխումների մեկնարկը և գործընթացը, Լեռնային Ղարաբաղի Հանրապետության հռչակման 25-րդ տարեդարձը, անկախության հանրաքվեի 25 ամյակը և դեկտեմբերի 28-ին՝ առաջին խորհրդարանական ընտրությունների քառորդդարյա տարեդարձը:
Խորհրդարանի ղեկավարն անդրադարձել է նաև ապրիլի 2-ին Ադրբեջանի հրահրած ռազմական ագրեսիային, որը, Աշոտ Ղուլյանի խոսքով, ցավալի հետևանքներ է ունեցել առաջին հերթին մարդկային կորստի առումով, սակայն այդ օրերին արձանագրվեց նաև Արցախի շուրջ համազգային միասնականության կարևորագույն արտահայտությունը:
Կարդացեք նաև
Ազգային ժողովի նախագահը այնուհետև ներկայացրել է 6-րդ գումարման Ազգային ժողովի երրորդ և չորրորդ նստաշրջաններում խորհրդարանի կատարած աշխատանքների հիմնական ուղղությունները:
Երկու նստաշրջանի ընթացքում խորհրդարանն ընդհանուր առմամբ գումարել է 13 լիագումար նիստ, այդ թվում՝ մեկ արտահերթ նիստ և մեկ արտահերթ նստաշրջան:
Շրջանառության մեջ է դրվել 57 օրենք։ Օրենսդրական նախաձեռնություններից 4-ը պատգամավորական է, 53-ը` կառավարությանը:
Խորհրդարանն ընդունել է 48 օրենք, որից 12-ը՝ մայր օրենք:
Աշոտ Ղուլյանի բնորոշմամբ, անցած տարին, աշխույժ էր նաև խորհրդարանի արտաքին հարաբերությունների ամրապնդման և զարգացման առումով: Ազգային ժողովի միջխորհրդարանական հարաբերություններում, ինչպես նախկինում գերակշռող տեղ են ունեցել Հայաստանի Հանրապետության Ազգային ժողովի հետ կապերը:
«Այս առումով չափազանց կարևոր եմ համարում երկու խորհրդարանների մշտական հանձնաժողովների՝ հրատապ թեմաների շուրջ հստակ օրակարգով համատեղ նիստերն ու տարբեր ձևաչափով հանդիպումները»,-նշել է խորհրդարանի նախագահը:
Խորհրդարանական պատվիրակություններից զատ Արցախի Ազգային ժողովում հյուրընկալվել են նաև ՀՀ կառավարական պատվիրակություններ, հայ և արտասահմանյան հասարակական ոլորտի ներկայացուցիչներ, արտերկրի քաղաքական գործիչներ ու խորհրդարանականներ:
Սեպտեմբերին ԱԺ պատվիրակությունն այցելել է Բելգիայի Թագավորություն, իսկ դեկտեմբերի կեսերին կայացել է խորհրդարանի նախագահի այցը Ֆրանսիական Հանրապետություն:
Խորհրդարանական գործունեությունն ամփոփելուց հետո ԱԺ նախագահը պատասխանել է լրագրողների հարցերին, որոնք վերաբերում էին ինչպես խորհրդարանի 25 -ամյա գործունեությանը, Արցախի Հանրապետության Սահմանադրության նախագծի յուրահատկություններին, նրա առանձին հոդվածներին, ապրիլյան ագրեսիայի հետևանքով խորհրդարանական դիվանագիտության մեջ հնարավոր փոփոխությունների անհրաժեշտությանը, Արցախի միջազգային ճանաչման հնարավորություններին եւ այլ թեմաների:
ԼՂՀ ԱԶԳԱՅԻՆ ԺՈՂՈՎԻ ՄԱՄՈՒԼԻ ԾԱՌԱՅՈՒԹՅՈՒՆ
