ԱՄՆ Կենտրոնական հետախուզական վարչությունը հրապարակել է շուրջ 12 մլն էջ փաստաթուղթ, որոնք վերաբերում են 1940-1990թթ. ընկած ժամանակահատվածում ԿՀՎ գործունեությանը, հաղորդում է Bloomberg-ը: Փաստաթղթերը հասանելի են գերատեսչության կայքում:
Գաղտնազերծված փաստաթղթերի թվում են, մասնավորապես, զեկույցներ գերատեսչության քաղաքականության և հետախուզական գործողությունների վերաբերյալ: Բացի այդ, դրանց մի մասը որոշակիորեն լույս է սփռում Վիետնամի և Կորեայի, ինչպես նաև սառը պատերազմի ժամանակաշրջանում ԿՀՎ գործունեության վրա:
«Այդ պատմական փաստաթղթերի հասանելիությունն այլևս չի սահմանափակվում աշխարհագրությամբ»,- հայտարարել է ԿՀՎ տեղեկատվության հարցերով վարչության ղեկավար Ջոզեֆ Լամբերտը: Ավելի վաղ այդ փաստաթղթերը հասանելի էին միայն Քոլեջ Փարքում (Մերիլենդ նահանգ) գտնվող Ազգային արխիվում:
ԿՀՎ ներկայացուցիչ Հեզեր Ֆրից Հորնիաքն իր հերթին հավելել է, որ «գաղտնազերծված փաստաթղթերը մի ամբողջ պատմություն են, դրանցում կա և՛ լավը, և՛ վատը»: Նրա խոսքով՝ այդ նյութերի մեծ մասն աննշան խմբագրության են ենթարկվել՝ տեղեկատվության աղբյուրները պաշտպանելու համար:
Կարդացեք նաև
Սկզբնապես նախատեսվում էր, որ այդ փաստաթղթերը կհրապարակվեն 2017թ. վերջին:
Պատրաստեց՝ Վիկտորյա ԱՆԴՐԵԱՍՅԱՆԸ
