Կառավարությունը պատրաստվում է արտոնություն տրամադրել «Նանման» ՍՊԸ-ին՝ ներմուծվող տեխնոլոգիական սարքավորումների, դրանց բաղկացուցիչ ու համալրող մասերի, հումքի եւ նյութերի նկատմամբ: Այս մասին տեղեկանում ենք կառավարության հունվարի 19-ի նիստի օրակարգից:
Ընկերությունը նախատեսում է Չինաստանից 15.2 միլիոն դրամի հումք՝ ջինսե գործվածք ներկրել, ինչի համար, ըստ որոշման նախագծի, ազատվում է մաքսատուրքից:
Այս ընկերությունը, ինչպես գրված է որոշման նախագծում, արտահագուստ է արտադրում, իսկ Չինաստանից է պատրաստվում ներմուծել ջինսե գործվածք, քանի որ այսպիսի գործվածք ԵԱՏՄ անդամ երկրներում չի արտադրվում:
«Նանման»-ին կառավարությունը նախորդ տարվա սեպտեմբերի 15-ին էլ է հումք ներմուծելու համար ազատել մաքսատուրքից, եւ ըստ հիմնավորման, արտոնությունից օգտվելու արդյունքում ընկերությունը ստեղծել է 3 նոր աշխատատեղ, զգալիորեն ավելացրել է իրացման շրջանառությունը ներքին շուկայում։
Կարդացեք նաև
Ծրագրի շրջանակում նախատեսվում է իրականացնել 19.9 միլիոն դրամի ներդրում, ստեղծել 1 նոր աշխատատեղ՝ 78.000 դրամ միջին աշխատավարձով. գրված է նախագծի եզրակացությունում:
Հիշեցնենք, որ սա այն ընկերությունն է, երբ Կարեն Կարապետյանը նոր էր նշանակվել վարչապետ, եւ նրա վարած առաջին նիստերից մեկի ժամանակ, սեպտեմբերին, երբ այն ժամանակվա էկոնոմիկայի նախարար Արծվիկ Մինասյանը զեկուցեց մաքսատուրքից ազատելու մասին որոշման նախագիծը, վարչապետը հանդիմանեց Մինասյանին:
Վարչապետի հարցին՝ որքան ժամանակ են ծախսում ընկերությունները նման արտոնություններ ստանալու համար, Մինասյանը պատասխանել էր՝ մոտ մեկ շաբաթ։ Ապա Կարեն Կարապետյանը հետաքրքրվել էր՝ «Նանման» ընկերությունը ե՞րբ է դիմել էկոնոմիկայի նախարարություն: Արծվիկ Մինասյանն էլ կրկնել էր՝ գրեթե մեկ շաբաթ առաջ: Այս պատասխանը վարչապետը կասկածի տակ էր առել, ասելով՝ «Չեմ հավատում»:
Հետո Արծվիկ Մինասյանը վստահեցրել էր, որ լրացուցիչ կներկայացնի այդ տեղեկությունը: «Չգիտե՞ք»,- հարցրել էր վարչապետը, ինչին ի պատասխան Մինասյանը խոստովանել էր, որ այդ պահին չգիտի: «Բա ինչո՞ւ չգիտեք, պարոն Մինասյան: Բիզնեսին աջակցող նախարարություն եք, դուք պետք է իրանց ձեռքը բռնած բոլոր կառույցներով գնաք, որ իրենք իրանց ապահով զգան, որ որեւէ մեկն իրենց չխոչընդոտի: 1.5 մլն դրամ արտոնություն է խնդրում, երեւի մի յոթ ամիս նամակագրություն է գրել, մենք պետք է էդ ամեն ինչը դասակարգենք, որ բյուրոկրատիան վերացնենք»,-ասել էր վարչապետը:
Կառավարության նիստի օրակարգում նշված է, որ որոշման զեկուցողը լինելու է տնտեսական զարգացման եւ ներդրումների նախարար Սուրեն Կարայանը: Հետաքրքիր է՝ վարչապետը Կարայանի՞ն էլ «նեղը» կգցի, Մինասյանի պես հարցախեղդ կանի՞:
Նելլի ԲԱԲԱՅԱՆ
