ԵԱՀԿ Ժողովրդավարական հաստատությունների եւ մարդու իրավունքների գրասենյակը (ԵԱՀԿ/ԺՀՄԻԳ) հունվարի 12-ին հրապարակել էր ԵԱՀԿ/ԺՀՄԻԳ կարիքների գնահատման առաքելության զեկույցը:
Այս փաստաթղթում ԵԱՀԿ/ԺՀՄԻԳ-ը ՀՀ իշխանություններին խորհուրդ է տալիս ապրիլին կայանալիք խորհրդարանական ընտրությունները հետեւելու համար Հայաստան դիտորդական առաքելություն ուղարկել, ինչի համար անհրաժեշտ է ՀՀ իշխանությունների հրավերը: Ի լրումն փորձագետների հիմնական թիմի` ԵԱՀԿ/ԺՀՄԻԳ-ը խորհուրդ է տալիս Հայաստան գործուղել 24 երկարաժամկետ դիտորդների (ԵԱՀԿ անդամ երկրներից) ողջ երկրի տարածքում ընտրությունները դիտարկելու նպատակով, ինչպես նաեւ 250 կարճաժամկետ դիտորդների՝ ընտրությունների օրը դիտարկելու համար:
Aravot.am-ը ՀՀ Կենտրոնական ընտրական հանձնաժողովի (ԿԸՀ) նախագահ Տիգրան Մուկուչյանից հետաքրքրվեց` ՀՀ իշխանությունները որևէ առարկություն ունե՞ն, եթե ոչ, ապա ե՞րբ կուղարկեն հրավեր ԵԱՀԿ/ԺՀՄԻԳ դիտորդական առաքելության համար: Պարոն Մուկուչյանը տեղեկացրեց, որ մի քանի օրից հրավերը կլինի ու նաև պարզաբանեց. «Հրավեր ուղարկող սուբյեկտը ԿԸՀ-ն չէ: Սահմանված ժամկետում հրավերը լինելու դեպքում հրապարակային կիրազեկենք այդ մասին»:
ԵԱՀԿ/ԺՀՄԻԳ-ի դիտարկմամբ` ՀՀ նոր ընտրական համակարգը բարդ է, և ընտրական գործընթացը բավական շեղվում է մաքուր համամասնական համակարգից: Պարոն Մուկուչյանը կարճ արձագանքեց. «Օրենքով ամրագրված դրույթներ են: Մեր գործառույթը դրանք անվերապահորեն կյանքի կոչելն է»:
Կարդացեք նաև
Մեր այն հստակեցմանը, թե եվրոպացի գործընկերները ի՞նչ նկատի ունեն` ասելով շեղում համամասնական ընտրակարգից և արդյոք համամի՞տ է այդ դիտարկումների հետ ու հնարավո՞ր են լրացուցիչ շտկումներ այս հարցով, ԿԸՀ նախագահը պատասխանեց. «Ըստ նրանց` շեղումը վերաբերում է համամասնական ընտրակարգին, որը զուգակցում է համապետական և տարածքային ընտրական ցուցակներով ընտրությունների իրականացումը»:
Անդրադառնալով հարցին` շտկումների մտցմանը վերաբերող հատվածին` պարոն Մուկուչյանը նշեց. «Նախ նման խնդիր դրված չէ և երկրորդն էլ համամասնական ընտրակարգն ունի բազում տարատեսակներ, որոնցից մեկն էլ ամրագրված է մեր Ընտրական օրենսգրքում»:
Տաթև ՀԱՐՈՒԹՅՈՒՆՅԱՆ
