ԲՀԿ նախկին առաջնորդ ու քաղաքականությունից հեռացած Գագիկ Ծառուկյանի՝ քաղաքականություն վերադառնալը ԱԺ ՀՀԿ-ական պատգամավոր Սուքիաս Ավետիսյանի համոզմամբ, միայն ընդդիմադիր դաշտում մրցակցությունը կավելացնի: Ըստ նրա, Ծառուկյանի վերադարձով ԲՀԿ-ն լուրջ դերակատարություն քաղաքական դաշտում չի ունենա. «Գլխավոր դերակատարը քաղաքական դաշտում ՀՀԿ-ն է»:
Իսկ թե ԲՀԿ-ն ՀՀԿ-ին ընտրություններում մրցակից կլինի, թե ոչ, պարոն Ավետիսյանը պատասխանեց՝ ընթացքը ցույց կտա:
-2015 թվականի փետրվարի տասներկուսին ՀՀ նախագահ Սերժ Սարգսյանի հայտնի ելույթից հետո, ՀՀԿ-ականները պնդում էին, որ երկար ժամանակ արգելվել էր խիստ գնահատականներ տալ Ծառուկյանի հասցեին, այդ մասին հայտարարեց նաեւ Սերժ Սարգսյանը, այս փուլում արգելանք կա՞, թե՝ոչ:
Ս. Ա -Նման ոչ արգելանք է եղել, ոչ էլ արգելանքի վերացում: Մարդ է, որը ցանկություն ունի նորից քաղաքականություն վերադառնալ, ինչու ենք փորձում ինչ-որ բաներ գտնել դրա մեջ, երկու տարի առաջ դուրս եկավ, հիմա ցանկանում է մտնել ակտիվ քաղաքականություն:
Կարդացեք նաև
– Սերժ Սարգսյանը, ՀՀԿ-ականները պնդում էին, որ Գագիկ Ծառուկյանը չարիք է, հիվանդություն, որից օր առաջ պետք է ազատվել, հիմա կրկին փորձելո՞ւ եք օր առաջ ազատվել:
Ս. Ա- Էլի եմ ասում, մարդու իրավունքն է քաղաքականություն մտնել կամ քաղաքականությունից դուրս գալ, իսկ ցանկացած մարդու նկատմամբ էլ կարելի է խոսել, ու քաղաքական ցանկացած գործչի մասին էլ խոսում են:
-Այսինքն, Ծառուկյանի կամ նրա գլխավորած քաղաքական ուժի դեմ ՀՀԿ-ն այլեւս չի՞ պայքարի:
Ս. Ա- Որին ինչ ձեւով կարելի է անվանել, դա արդեն քաղաքականության խնդիրն է, հիմա մարդ է ուզում է մտնել քաղաքականություն, թող մտնի, ինչ է եղել:
Արփինե ՍԻՄՈՆՅԱՆ
Հ. Գ. Հիշեցնենք, որ 2015 թվականի փետրվարի 12-ին տեղի ունեցած ՀՀԿ խորհրդի նիստի ժամանակ Սերժ Սարգսյանը հայտարարել էր. «Ստեղծված իրավիճակում ես ընդունում եմ մեղքի իմ բաժինը: Տարիներ շարունակ ես եմ ուղղակիորեն արգելել ձեզ հրապարակավ հանդես գալու Ծառուկյան Գագիկի բոլոր անհեթեթությունների դեմ՝ անձամբ փակելով այդ քաոսը, ե՛ս եմ արգելել որևէ մեկին հոլովել ժողովրդի կողմից դակված «Դոդի Գագո» կնիքը, ե՛ս եմ բոլորիդ հորդորել ժամանակ տալ այստեղ-այնտեղ հնչեցրած հերթական վտանգավոր նախադասությունից հետո՝ բացատրելով, որ նա ուղղի իր սխալը»:
