«Խոսքի ազատության պաշտպանության կոմիտե»-ի տվյալներով՝ 2016-թ.-ին լրագրողների ու լրատվամիջոցների ներգրավվածությամբ 16 նոր դատական գործ է արձանագրվել, որոնցից 14-ն առնչվում են վիրավորանքին եւ զրպարտությանը, երկուսը՝ դրամաշորթությանը եւ մեկը՝ անմեղության կանխավարկածի խախտմանը: Այս մասին այսօր «Հայաստանում խոսքի ազատության վիճակի եւ լրագրողների ու ԶԼՄ-ների իրավունքների խախտումների մասին» 2016 թվականի տարեկան զեկույցի քննարկման ժամանակ լրագրողների հետ զրույցում ասաց ԽԱՊԿ նախագահ Աշոտ Մելիքյանը:
«Իհարկե, գործերի մեծամասնությունն ընդդեմ լրատվամիջոցների է, չնայած ունենք գործեր, որոնց դեպքում լրագրողներն իրենք են դիմել դատարան՝ իրենց արժանապատվությունը պաշտպանելու համար»,-նշեց Աշոտ Մելիքյանը:
Ըստ նրա՝ նախորդ տարին լրագրողների համար ծայրահեղ լարված էր, մասնավորապես՝ պայմանավորված այն հանգամանքով, որ ՊՊԾ գնդի գրավմանը հաջորդած դեպքերի ժամանակ լրատվամիջոցների աշխատակիցներն իրավապահների թիրախը դարձան. «Նույնիսկ անգամ երբ լրագրողները հեռանում էին դեպքի վայրից, ենթարկվում էին ծեծի, նրանց տեխնիկան կոտրում էին: Իշխանությունները պետք է միջոցներ ձեռնարկեն՝ նման լարված պայմաններում լրագրողների համար բարենպաստ պայմաններ ստեղծելու համար, այլ ոչ թե նրանց աշխատանքին խոչընդոտեն եւ բռնություն կիրառեն»:
Կարդացեք նաև
Մանրամասն՝ տեսանյութում
Լուիզա ՍՈՒՔԻԱՍՅԱՆ
