Լրագրող Վահե Մակարյանն իր պատիվն ու արժանապատվությունն արատավորելու համար դատարան է դիմել: Նա պահանջում է ԱԺ պատգամավոր Ռուբիկ Հակոբյանից հրապարակային ներողություն խնդրել իրեն վիրավորելու համար:
«Ես դատական հայց եմ ներկայացրել ինձ հասցրած վիրավորանքների համար, քանի որ նա միջադեպից հետո Ազգային ժողովի դահլիճից, նաև տարբեր հարցազրույցներում ու իր գրառումներում իմ հասցեին վիրավորական արտահայտություններ է թույլ տվել։ Մասնավորապես՝ խուլիգան, տգետ, հանցագործ, նաև ասել է, թե ես, իբր, պատվեր եմ կատարել իր դեմ: Այդ ամենը վիրավորանք է իմ հասցեին, դրանք իմ հեղինակությունը, պատիվն ու արժանապատվությունը արատավորող խոսքեր են, մտածեցի՝ դրանց պետք է իրավական ընթացք տրվի»,- Aravot.am-ին ասաց Վահե Մակարյանը:
Նրա խոսքով, ինքն էլ է լրատվամիջոցներից տեղեկացել, որ իր հայցով դատական առաջին նիստը նշանակված է մայիսի տասնութին:
Վիրավորանքների ու արժանապատվությունն արատավորելու համար ֆինանսական փոխհատուցման պահանջի վերաբերյալ հարցը Վահե Մակարյանը դեռ պետք է քննարկի փաստաբանի հետ, բայց հրապարակային ներողություն խնդրելու պահանջից հաստատ չի հրաժարվի. «Պատգամավորը կամ պետք է հիմնավորի, թե ինչու եմ խուլիգան, որտեղ է տեսել իմ խուլիգանությունը կամ իմ կատարած հանցագործությունը, որովհետեւ իմ ապրած քսանյոթ տարվա մեջ որեւէ հանցագործ արարք չեմ գործել, նա պետք է հիմնավորի, թե ինչով եմ տգետ, կամ էլ ինձ վիրավորող անձը պետք է պատասխանատվության ենթարկվի»:
Կարդացեք նաև
Արփինե ՍԻՄՈՆՅԱՆ
