2017 թվականի ապրիլի 2-ի խորհրդարանական ընտրությունների մասնակցելու նպատակով ստեղծվելիք ՀՅԴ Շիրակի մարզի նախընտրական շտաբը կգլխավորի Շիրակի մարզպետ Հովսեփ Սիմոնյանը: Aravot.am-ի այս տեղեկությունը հաստատեց Հովսեփ Սիմոնյանը:
Հիշեցնենք, որ Շիրակի մարզպետը անցած տարվա դեկտեմբերի վերջին մեզ հետ զրույցում նշել էր, որ ինքը որպես թեկնածու չի ընդգրկվելու ՀՅԴ-ի ցուցակում: «Ոչ, իմ անունը չի լինելու, ես պետական պաշտոնյա եմ, ունեմ իմ գործառույթներն, աշխատելու եմ, իմ համար նախատեսված է աշխատանք, որը պիտի իրականացնեմ: Նույն մարդը չի կարող բոլոր տեղերում լինել պահանջված, եթե ես այսօր գործադիր մարմնում աշխատում եմ, ու կուսակցությունը գտել է, որ ես գործադիրում շատ ավելին կարող եմ անել, քան օրենսդիրում, չեմ գտնում, որ բոլոր տեղերում ճիշտ կլինի նույն անձի հայտնվելը»,-ասել էր Հովսեփ Սիմոնյանը:
Ակնհայտ է, որ սա յուրատեսակ քննություն է ՏԻՄ ընտրություններին պարտություն կրած մարզպետի համար, այս դեպքում ՀՅԴ-ն նրա ուսերին շատ կոնկրետ պատասխանատվություն է դնում: Իսկ թե ինչպե՞ս կհամատեղի Հովսեփ Սիմոնյանը շտաբի պետի ծանր աշխատանքը մարզպետի պատասխանատու պաշտոնի հետ, արձակուրդ կվերցնի՞, թե՞ կհամատեղի երկու աշխատանքներ էլ, նախընտրական աշխատանքները բնականաբար թողնելով ոչ աշխատանքային ժամերին, այս թեմային կանդրադառնանք առաջիկայում:
Նունե ԱՐԵՎՇԱՏՅԱՆ
Կորա՜վ ՀՅԴ-Ն