«Հայաստանի սպառողների ազգային ակադեմիայի» միջազգային գործընկերների տվյալներով՝ նոյեմբերին ալյուրի եւ շաքարավազի գները ողջ աշխարհում զգալի նվազել են, իսկ դեկտեմբերին փոքր-ինչ բարձրացել: Այս մասին այսօր «Նոյյան տապան» լրատվական գործակալության մամուլի սրահում լրագրողներին հայտնեց «Հայաստանի սպառողների ազգային ակադեմիայի» նախագահ Մելիտա Հակոբյանը:
Նա տեղեկացրեց, որ դեկտեմբերի 18-ից հետո, օրինակ՝ Ռուսաստանում, ալյուրի գինը փոքր-ինչ բարձրացել է, մինչդեռ ՀՀ-ում նման բան չի գրանցվել:
«Մենք տեսե՞լ ենք, որ ալյուրն ու շաքարավազը կտրուկ էժանանան: Ոչ: Մենք աշխարհի հետ չենք շարժվում: Ով իր գինն ուզում՝ թելադրում է»,-անդրադառնալով ՀՀ-ում ալյուրի եւ շաքարավազի գների բարձրացմանը՝ դժգոհեց սպառողների իրավունքների պաշտպանը: Նա համոզմունք հայտնեց, որ դա կամայական թանկացում է:
Մելիտա Հակոբյանի ղեկավարած կառույցը չունի տվյալներ այն մասին, թե ՀՀ-ում շաքարավազը 3-4 անգամ թանկանալու է:
Կարդացեք նաև
«Պետությունն ինքը պետք է միջամտի գնային վայրիվերումներին: Ինքը պետք է գնում կատարի ալյուր ու շաքար ներկրողից: Բացի այդ, պետությունը կարող է ինքը գնում կատարել եւ վայրիվերումների ժամանակ ապրանքը մտցնել շուկա՝ գինը պահպանելու համար: Այդ դեպքում ներկրողն իրեն «կհավաքի», սոցիալապես անապահով խավը չի տուժի»,-ասաց Մելիտա Հակոբյանը:
Նա նշեց, որ կառավարությանը շուկայի գների կարգավորման ծրագիր են ներկայացնելու, որը տարիներ առաջ արդեն իսկ մերժել է Կենտրոնական բանկը: Ծրագիրը ենթադրում է տույժ՝ ապրանքատեսակների գները կամայական բարձրացնողների համար:
Լուիզա ՍՈՒՔԻԱՍՅԱՆ
