ՀՀ-ում մինչեւ դեկտեմբերի 20-ը էական գնաճ չի եղել՝ բացառությամբ ընդեղենի եւ «ժամանակավոր վաճառվող» սննդամթերքի՝ հնդկահավ, խոզի ազդրամիս: Այս մասին այսօր «Նոյյան տապան» լրատվական գործակալության մամուլի սրահում լրագրողներին հայտնեց «Հայաստանի սպառողների ազգային ակադեմիայի» փոխնախագահ, մոնիթորինգի բաժնի պետ Ռուբեն Հայթյանը:
«Այս պահին ներկրված մրգերը՝ ցիտրուսը, աննշան թանկացել են: Փոքր խանութներում եւս թուրինջի եւ նարինջի քիչ թանկացումներ կան՝ դեկտեմբերի համեմատ»,-տեղեկացրեց նա: Ռուբեն Հայթյանը նշեց, որ ներկայում որոշ ալկոհոլային խմիչքների գները եւս փոքր-ինչ բարձրացել են: Ըստ նրա՝ աննշան գնաճը մասամբ հիմնավորված է, սակայն պատճառները դեռ պարզ չեն:
Անդրադառնալով նախատոնական շրջանում սպառողական շուկայի գնային քաղաքականությանը՝ «Հայաստանի սպառողների ազգային ակադեմիայի» նախագահ Մելիտա Հակոբյանն էլ իր հերթին հայտնեց, որ թանկացում գրեթե չի եղել. «Թանկացել է միայն ընդեղենը եւ չրեղենը: Երբ վաճառողներին հարցրեցի, թե չիրը տեղական է, ինչո՞ւ են թանկացնում, ասացին, որ պահանջարկ կա, թանկացնում ենք»:
Լուիզա ՍՈՒՔԻԱՍՅԱՆ
