Փարիզում 75 երկրների և կազմակերպությունների մասնակցությամբ տեղի ունեցած համաժողովը կոչ է արել հիմնել անկախ պաղեստինյան պետություն, որի համար Իսրայելը պետք է հետ քաշի իր զորքերը մինչև 1967թ. եղած սահմանը, հաղորդում է Reuters-ը:
Ուշագրավ է, որ ո՛չ Իսրայելի, ո՛չ Պաղեստինի իշխանությունները ֆորումի աշխատանքներին չեն մասնակցել:
Համաժողովի ամփոփիչ փաստաթղթում նշվում է, որ որպես հակամարտության կարգավորման հիմք՝ պետք է ընդունվեն Իսրայելի՝ մինչև 1967թ. եղած սահմանները: Համաժողովը ողջունել է ՄԱԿ-ի Անվտանգության խորհրդի վերջերս ընդունված բանաձևը, որով դատապարտվում էր Իսրայելի բնակարանաշինության ծրագիրը:
Ֆրանսիայի արտգործնախարար Ժան-Մարկ Էյրոն հայտարարել է, որ այսօր Մերձավոր Արևելքում խաղաղության գործընթացը փաստացիորեն հայտնվել է փակուղում՝ Պաղեստինի և Իսրայելի միջև ուղղակի երկխոսության բացակայության պատճառով: «Բայց հենց դրա համար են 70 երկրների ներկայացուցիչները հավաքվել, որպեսզի քննարկեն հակամարտության կողմերի միջև ուղղակի բանակցությունների վերականգնմանը նպաստելու հնարավորությունները»,- ասել է նա:
Կարդացեք նաև
Իսրայելի վարչապետ Բենյամին Նեթանյահուն ավելի վաղ մերժել էր համաժողովին մասնակցելու հրավերը՝ նշելով, որ այն զբաղվում է իր երկրի դեմ «կեղծարարություններով» և նպատակ ունի Իսրայելի դեմ նոր սահմանափակումներ մտցնել: Մասնավորապես, Իսրայելի վարչապետը դեմ էր արտահայտել, որ Իսրայելի զբաղեցրած տարածքները (այդ թվում Արևելյան Երուսաղեմում) կոչվեն «օկուպացված»:
Պաղեստինի վարչակազմի նախագահ Մահմուդ Աբասը, իր հերթին խոստացել է առաջիկա շաբաթներին հանդիպել Ֆրանսիայի նախագահ Ֆրանսուա Օլանդի հետ և քննարկել համաժողովի արդյունքները:
Հիշեցնենք, դեկտեմբերի 23-ին ՄԱԿ-ի Անվտանգության խորհուրդն ընդունել է բանաձև, որն արգելում է Իսրայելին նոր կացարաններ կառուցել Պաղեստինի տարածքներում: Ենթադրվում էր, որ բանաձևի նախագիծը կմերժվի, քանի որ ԱՄՆ-ը վետո կդնի դրա վրա, սակայն ԱՄՆ ներկայացուցիչը ձեռնպահ է մնացել, և բանաձևն ընդունվել է:
Դրանից հետո Իսրայելի կառավարությունը հայտարարել է, որ հրաժարվում է կատարել բանաձևի դրույթները: Ավելին, Նեթանյահուն կարգադրել է երկրի ԱԳՆ-ին մեկ ամսվա ընթացքում վերանայել ՄԱԿ-ի հետ հարաբերությունները, այդ թվում կազմակերպության ֆինանսավորումը:
Պատրաստեց՝ Վիկտորյա ԱՆԴՐԵԱՍՅԱՆԸ
