Վարչապետ Կարեն Կարապետյանն այսօր կայացած մամուլի ասուլիսում ամփոփել է ՀՀ կառավարության 100 օրվա գործունեությունը՝ ներկայացնելով ըստ ոլորտների կատարված աշխատանքները:
Ախտորոշվել են մշակույթի ոլորտի հետևյալ խնդիրները՝
- մարզերի մշակութային անհամաչափ զարգացում.
- աշխարհասփյուռ հայության մշակութային ներուժի միասնական դրսևորումների գրեթե բացակայություն.
- մշակույթի ոլորտի զարգացման տնտեսական բաղադրիչի ցածր արդյունավետություն.
- հայ մշակույթի հանրահռչակման, արտասահմանում հայ դասական և ժամանակակից արվեստի տարածման հետ կապված խնդիրներ.
- մշակութային ծրագրերի և հեռուստահաղորդաշարերի ցուցադրման սակավություն.
- օտարերկրյա պետություններում հայկական պատմամշակութային հուշարձանների հաշվառման, վավերագրման և առկա տեղեկատվական շտեմարանի համալրման խնդիրներ.
- այլ մշակույթների ցածր ներկայացվածություն Հայաստանում,
- մշակութային կազմակերպությունների կողմից ծառայությունների մատուցման գործընթացներում ժամանակակից տեղեկատվական և տեխնիկական միջոցների ոչ արդյունավետ օգտագործում:
Արդյունքում՝
- մարզերի բնակչությանը հասանելի չեն մշակութային ծառայությունները, երբ մայրաքաղաքում դրանք բազմազան են և հասանելի, լիարժեք չեն գործում մարզային մշակութային կազմակերպություններն ու ենթակառուցվածքները.
- լիարժեք չի դրսևորվում աշխարհասփյուռ հայության մշակութային ներուժը.
- ցածր են մշակութային արտադրանքից, ծառայություններից, գույքի օգտագործումից ստացվող եկամուտները, ցածր է մշակույթի ոլորտում կառավարման ժամանակակից մոդելների կիրառելիությունը.
- հայկական պատմամշակութային հուշարձանների ուսումնասիրման, պահպանության, հաշվառման ցածր աստիճանը վտանգում է օտարերկրյա պետություններում հայկական ժառանգությունը.
- հայրենական և արտասահմանյան մշակութային ծառայությունների մատչելիությունը և հասանելիությունը չի բավարարում հասարակության տարբեր խմբերի պահանջմունքներին:
Ինչ է արվել՝
Կարդացեք նաև
- Մեկնարկել են մշակութային կազմակերպություններում միասնական էլեկտրոնային տոմսային համակարգի ներդրման աշխատանքները: Ժամանակակից կապի և տեղեկատվական միջոցների կիրառմամբ ստեղծվել են Հայաստանի 7 թանգարանի հավաքածուների մասին պատմող՝ IOS և Android օպերացիոն համակարգերի հիման վրա աշխատող «Աուդիոգիդ» բջջային հավելվածները:
- Թատրոնների նյութատեխնիկական բազայի արդիականացման և վերանորոգման նպատակով՝ Գ. Սունդուկյանի անվան ազգային ակադեմիական թատրոնում ներդրվել և արդիականացվել են լուսաձայնային սարքավորումները, բեմական մեխանիզմները, մինչև տարեվերջ կավարտվեն Արտաշատի Ա. Խարազյանի անվան դրամատիկական թատրոնի վերանորոգման աշխատանքները:
- Մշակվել և ՀՀ կառավարություն է ներկայացվել «Կինեմատոգրաֆիայի մասին» ՀՀ օրենքի նախագիծը:
- Նախնական պայմանավորվածություններ են ձեռք բերվել մասնավոր կազմակերպությունների հետ, որպեսզի նախարարության ենթակայության գրադարաններում առաջիկայում ընթերցողներն ունենան անվճար Wi-Fi ինտերնետ.
- ՀՀ մշակույթի նախարարության և ՌԴ-ի պետական էրմիտաժի թանգարանի միջև ստորագրվել է համագործակցության պայմանագիր Կարմիր բլուր հնավայրում համատեղ պեղումներ և գիտական ուսումնասիրություններ իրականացնելու վերաբերյալ:
- Ավարտվել է ՀՀ Արագածոտնի մարզի Աղձքի համայնքի «Արշակունյաց թագավորների դամբարան» հուշարձանի պեղումների հերթական փուլը, ընթացքի մեջ են «Դվին», «Արտաշատ» պատմական մայրաքաղաքների, «Աղձք» արքայական դամբարանի ամրակայման նախագծերի կազմման աշխատանքները, հաստատվել են Հայաստանում պատմամշակութային անշարժ հուշարձանների 200 պահպանական գոտու 10 հուշարձանային կադաստրի ցանկերը, աշխատանքների հետ կապված ծախսերը նախատեսված են ՀՀ 2017 թ. պետական բյուջեում:
- ՀՀ մշակույթի նախարարության ենթակայությամբ գործող ՊՈԱԿ-ների միացման ձևով վերակազմակերպումների արդյունքում 31 հաստիքային միավոր կրճատվել է, տնտեսումը կազմել է 26400.0 հազ. Դրամ, ՀՀ մշակույթի նախարարի և նախարարության աշխատակազմերի օպտիմալացման և «Մշակութային ԾԻԳ» պետական հիմնարկի լուծարման արդյունքում կրճատվել է 30 հաստիքային միավոր և տնտեսվել է շուրջ 77 մլն. դրամ:
ՀՀ կառավարություն
