Այսօր Aravot.am-ի հետ զրույցում Նորք-Մարաշի զինված խմբի ղեկավար Արթուր Վարդանյանի պաշտպան Լեւոն Բաղդասարյանը վստահեցնում էր, որ ցանկացած մտադրություն ցանկացած քաղաքացի կարող է ունենալ, դա իր սահմանադրական իրավունքն է: Բայց եթե դա չի իրագործվում՝ ուրեմն հանցագործություն չէ:
Մեր հարցին՝ ահաբեկչական փորձը հանցագործություն չէ՞՝ Լեւոն Բաղդասարյանը պատասխանեց. «Երբ ես եւ դու որոշում ենք, որ Վրաստանը երկիր չի, որ Վրաստանի ղեկավարը լավ ղեկավար չի, եւ այդ մտադրությունը բացահայտվում է, դա հանցագործություն չի: Կարեւոր հանգամանք է այստեղ, որ մտադրությունից բացի կա դիմադրության իրավունք հասկացողությունը: Երբ անձը գտնում է, որ տարիներ շարունակ տեղի են ունենում շատ անօրինական գործառույթներ, ուզուրպացված է պայմանականորեն իշխանությունը, ուզուրպացված է բիզնեսը, իրավաբանության մեջ գոյություն ունի դիմադրության իրավունք: Այսինքն, անձին իրավունք է վերապահվում նաեւ անելու այնպիսի գործառույթներ, որ օրենքով նախատեսված կարող են նաեւ չլինել»:
Փաստաբանի խոսքերով՝ «Արթուր Վարդանյանը պատահական անձնավորություն չէր: Եթե այդ տվյալ անձնավորությունը համագործակցում է հենց պետության լիազոր մարմնի հետ երկրի հզորացման համար եւ հետո իրեն վերագրում են հանցագործություն, դա արդեն…»:
Մենք ճշտեցինք՝ պետության ո՞ր լիազոր մարմնի հետ է համագործակցել Արթուր Վարդանյանը: Լեւոն Բաղդասարյանը պատասխանեց. «Համագործակցել է պաշտպանության նախարարության հետախուզության հետ: Ավելին՝ վերջինս՝ պետական լիազոր մարմինը հոնորար է տվել, հրաժարվել է, եւ դրանից հետո ո՞նց եք պատկերացնում, որ մարդը հանցագործություն կատարի հենց իշխանության դե՞մ: Դա ուղղակի բացառվում է: Ուղղակի մարդը կարող է բարձրաձայնի, որ իշխանության ոլորտներում, ասենք, երկրի տնտեսությունը գտնվում է կործանարար վիճակում, ինչը մեկ տարի հետո հայտարարեց նաեւ գործող վարչապետը»:
Կարդացեք նաև
Հռիփսիմե ՋԵԲԵՋՅԱՆ
