Վարչապետ Կարեն Կարապետյանն այսօր կայացած մամուլի ասուլիսում ամփոփել է ՀՀ կառավարության 100 օրվա գործունեությունը՝ ներկայացնելով ըստ ոլորտների կատարված աշխատանքները:
Մասնավորապես, ախտորոշվել են պետական կառավարման համակարգի խնդիրները, այն է՝ ՀՀ պետական կառավարման համակարգը թեև խոշորածավալ չէ, սակայն ունի՝
- բյուրոկրատական կենտրոնացվածության բարձր աստիճան,
- հաճախ հատվածային, ոչ համարժեք կարգավորումներ տարբեր ոլորտներում,
- նոր գործառույթների առանձնացման և դրանց համար այս կամ այն մակարդակի մարմինների (կոմիտեներ, ՊՈԱԿ-ներ, գործակալություններ) ստեղծման և ուռճացման միտում,
- որոշումների արագ կայացմանը խոչընդոտող իրավասությունների և պարտականությունների անհամաչափ բաշխման դրսևորումներ,
- հաշվետվողականության և պատասխանատվության կոլեկտիվ տարրալուծման միտում:
Արդյունքում՝
Կարդացեք նաև
- ՀՀ քաղաքացին բավարար ծավալով չի օգտվում ՀՀ պետական մարմինների կողմից ժամանակակից տեխնոլոգիաների միջոցով մատուցվող ծառայություններից, թեև հաճախ այդպիսի ծառայություններ առկա են,
- ՀՀ քաղաքացին պետական ծառայությունների օգտագործումը համարում է դժվար և բարդացված,
- ՀՀ գործարարները հաճախ հիասթափվում են պետական ապարատի հետ շփումներից՝ պետական չինովնիկների բյուրոկրատական, սպասողական և նախաձեռնություններից զուրկ մշակույթի պատճառով:
Ինչ է արվել՝
- Ապահովվել է քաղաքացիներին մատուցվող ծառայությունների մատչելիությունը – ներդրվել է մեկ միասնական պատուհան՝ պետության կողմից ծառայությունների մատուցման գործառույթները մասնավոր 4 օպերատորներին («Հայփոստ», «Արդշինբանկ», «Ամերիաբանկ», «Կոնվերս բանկ») պատվիրակելու միջոցով:
- Արդիականացվել է թույլտվությունների տրամադրումը – ներկայում շրջանառության մեջ է «Թույլտվությունների մասին» ՀՀ օրենքի նախագիծը: Պետական կառավարման և տեղական ինքնակառավարման մարմինների կողմից քննարկումների առաջին փուլում ներկայացվել և այժմ գործում է թվով 132 թույլտվություն: Քննարկումների արդյունքում թույլտվությունների թիվը նվազել է 40-ով:
- Օպտիմալացվել են գերատեսչությունների աշխատակազմերը և ՊՈԱԿ-ները – Գերատեսչությունների աշխատակազմերի և ՊՈԱԿ-ների օպտիմալացման արդյունքում 2017 թ. ակնկալվում է տնտեսել շուրջ 3,9 մլրդ դրամ։ Արդյունքում ընդհանուր հաստիքների քանակը կկրճատվի շուրջ 12 տոկոսով՝ առկա 22961-ից դառնալով 20059։
- Օպտիմալացվելու են ՀՀ մարզային բյուջետային համակարգերը – ՀՀ վարչապետի՝ մարզային այցերի ընթացքում համակարգի օպտիմալացման վերաբերյալ տրված հանձնարարականների արդյունքում ՀՀ Տավուշի, Արագածոտնի, Շիրակի, Վայոց ձորի և Գեղարքունիքի մարզերում 2017 թ., ընդհանուր առմամբ, կտնտեսվի շուրջ 904 մլն դրամ։
- Խոշորացվելու են ոռոգման ոլորտի ջրօգտագործողների ընկերությունները – Խոշորացման արդյունքում 37 ՋՕԸ-երից ստեղծվելու է 14 ՋՕԸ: գործընթացը կավարտվի 2017 թ. մարտի 1-ին: իրականացման փուլում է գնումների և հաշվապահական հաշվառման կենտրոնացման գործընթացը։ Արդյունքում կառաջանա տնտեսում ՀՀ պետական բյուջեից յուրաքանչյուր տարի տրամադրվող խմելու ջրի սուբսիդիայի մասով՝ շուրջ 1.8 մլրդ դրամ:
ՀՀ կառավարություն
