«Սասնա ծռեր»-ի գործով անցնող բեռնատարի վարորդ Խաչատուր Գիչյանի առողջական վիճակն այսօրվա նիստից հետո կտրուկ վատացել է: Այս մասին Aravot.am-ին հայտնեց նրա փաստաբան Տիգրան Սարգսյանը: «Շտապօգնություն են կանչել եւ Գիչյանին տեղափոխել հիվանդանոց»,-ասաց Տիգրան Սարգսյանը: Նրա փոխանցմամբ՝ Գիչյանը նիստի ընթացքում դատարանին հայտնել է, որ իր առողջական վիճակը ծայրահեղ վատ է. «Ասաց, որ խցում 12 ծխող մարդ կա, որոնք օրը 24 ժամ ծխում են: Իր սիրտը վատ է: Ասաց, որ իրեն նման կերպ սպանում են…Նման պայմաններում մարդուն կալանքի տակ պահելը անօրինական է»:
Փաստաբանն իր հերթին հայտարարել է, որ կալանավորման անհրաժեշտություն չկա, քանի որ նախաքննությունն ավարտվել է. «Հիմա գործին ծանոթանալու փուլն է: Այսինքն, Գիչյանը ազատության մեջ մնալով՝ չի կարող խոչընդոտել քննությանը: Նշեցի, որ նա ունի մշտական բնակության վայր, ընտանիք, նախկինում արատավորված կամ դատապարտված չի եղել: Հայտարարեցինք, որ գործում չկա որևէ փաստական տվյալ, որ Գիչյանը մնալով ազատության մեջ՝ կարող է հակաիրավական որևէ բան անել»:
Տիգրան Սարգսյանը նշեց, որ Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանն, այնուամենայնիվ, մերժել է Խաչատուր Գիչյանի կալանքի վերացման դեմ ներկայացրած միջնորդությունը:
Հիշեցնենք, որ Գիչյանը մեղադրվում է Ոստիկանության ՊՊԾ գունդը գրաված «Սասնա ծռեր» խմբին աջակցելու համար:
Կարդացեք նաև
Լուիզա ՍՈՒՔԻԱՍՅԱՆ
