«2016թ.-ը Թուրքիայի համար այնքան ծանր տարի էր, որ այս տարում մեղմացումներ չեն ակնկալվում»,-կարծում է թուրքագետ Մուշեղ Խուդավերդյանը: «Պոստ Սկրիպտում» մամուլի ակումբում այսօր ամփոփելով նախորդ տարին՝ նա ասաց. « Թուրք-քրդական հարցում ծանրագույն տարի էր: Երկու հարյուրից ավելի թուրք զինվորներ են զոհվել Դիարբեքիրում: Թուրքիա-ՌԴ հարաբերություններում բարելավում է նկատվում: Չնայած ռուս դեսպանի սպանությանը, ռուսական կողմը նշեց, որ ռուս-թուրք հարաբերությունները դրանից չեն տուժելու: Նաեւ նշվեց, որ Հալեպի ազատագրման մեջ կարեւոր էր Թուրքիայի նշանակությունը: Մոտ ապագայում տեսանելի չէ ԵՄ-Թուրքիա վիզային ռեժիմի չեղարկումը, քանի որ ԵՄ-ն կողողվի թուրք միգրանտներով, ինչը ձեռնտու չէ: Ինչ վերաբերում է նախատեսվելիք սահմանադրական փոփոխություններին, ապա դրանք Էրդողանի վարչակազմի օգտին են»:
Թուրքագետն անդրադարձավ նաեւ տեղեկություններին, թե Թուրքիան մտադիր է ՀՀ-ի, ինչպես նաեւ՝ Իրանի հետ սահմանը զատել բետոնե պատով: «Տեղեկությունը ճշտման փուլում է: Թուրքիան գտնվում է Ասիա-Եվրոպա հատման կետում, «տառապում» է մաքսանենգությունից եւ ահաբեկչական հարձակումներից: Պատ կառուցելու մտադրությունը կարող է այդ տրամաբանության մեջ մտնել: Իսկ ՀՀ-ի հետ տնտեսական որեւէ կապ չկա, սակայն հայ-թուրքական սահմանին պատ կառուցելը արելի է դիտարկել որպես թուրք-իրանական սահմանին պատ կառուցելու մտադրության շարունակություն, այլ ոչ թե ՀՀ-ի դեմ ուղղված ինչ-որ քայլ»,-ասաց Մուշեղ Խուդավերդյանը:
Նա նաեւ համոզմունք հայտնեց, որ հայ-թուրքական հարաբերությունների զարգացման հեռանկար տեսանելի չէ:
Լուիզա ՍՈՒՔԻԱՍՅԱՆ
