Սոնա Վարդանյանը Իդա Ռուբինշտեյնին
կներկայացնի նաեւ Եվրոպայում
ԱԼ. Սպենդիարյանի անվան օպերայի եւ բալետի ազգային ակադեմիական թատրոնի բալետի առաջատար մենապարուհի Սոնա Վարդանյանն այսօր մեկնում է Ֆրանսիա՝ Arame Production-ի հրավերով (տնօրեն՝ Արմենակ Կարապետյան): Փետրվարի 1-6-ը Ֆրանսիայի քաղաքներում, այդ թվում՝ Լիոնում, Մարսելում, Թուլուզում, նա հանդես կգա ռուս ճանաչված պարուհի Իդա Ռուբինշտեյնի կյանքը ներկայացնող «Իդա» ներկայացման մեջ՝ գլխավոր հերոսուհու մենապարով: Ֆրանսիական հյուրախաղերը կմեկնարկեն Փարիզի հայտնի Palais Des Congres սրահում: Իսկ մինչ այդ հայ պարուհին նույն կերպարը կմարմնավորի Շվեյցարիայի եւ Բելգիայի որոշ քաղաքներում: Այս մասին «Առավոտին» տեղեկացրեց ինքը՝ Սոնա Վարդանյանը:
Ա. Սերովի «Իդա Ռուբինշտեյն» կտավը, 1910թ.:
Մեզ հետ զրույցում բալետի արտիստն ասաց, որ այդ նախագծի գաղափարի եւ իրականացման հեղինակը Arame Production-նն է, եւ հիշյալ ներկայացումն առաջին անգամ ցուցադրվել է 2016թ. հոկտեմբերին, Չելյաբինսկի Գլինկայի անվան օպերայի եւ բալետի պետական ակադեմիական թատրոնում, Նադեժդա Կալինինայի խորեոգրաֆիայով: Այլ դերապարերով հանդես են եկել ՌԴ վաստակավոր արտիստներ Մարինա Վեժնովեցը, Յուրա Կովալյովը եւ ուրիշներ: Նախագծում նույնիսկ կորդեբալետում հրավիրված են եղել արտիստներ տարբեր երկրներից:
Տեսարաններ «Իդա» ներկայացումից
«Հետաքրքիր էր աշխատել փորձառու եւ ճանաչված արվեստագետների հետ: Կայանալիք տուրնեի ժամանակ զուգընկերս է լինելու արեւմտյան թատրոնների ցանկալի հյուր, Բելառուսի վաստակավոր արտիստ Իգոր Օնոշկոյը, իսկ նվագախումբը կհրավիրվի Հունգարիայից: Ներկայացումները կվարի դիրիժոր Վադիմ Նիկիտինը: Ասեմ, որ Չելյաբինսկում պրեմիերայից հետո մամուլի արձագանքը շատ մեծ էր: Նշվում էր ոչ միայն բեմադրության հաջողության, այլ նաեւ ընտրված երաժշտության մասին. միքսված է հատվածներ Ֆորեի, Ռավելի, Դեբյուսիի, Ալբենիսի ստեղծագործություններից:
Հերոսուհիս՝ Իդան, ծնվել է Խարկովում՝ 1885թ., երկրային կյանքն ավարտել Ֆրանսիայում՝ 1960թ.: Հարուստ տոհմի դուստրը եւ որպես պարուհի, եւ որպես դրամատիկ դերասանուհի հիմնավոր կրթություն է ստացել: Անձնական եւ ստեղծագործական կյանքում, կարելի է ասել, այնքան էլ հաջողակ չի եղել: Բավական է ասել, որ 3 տարեկանում զրկվել է մորից, կարճ ժամանակ անց՝ հորից… Ամուսնալուծվել է հենց ամուսնական ճամփորդությունից հետո: Սեփական միջոցներով բեմադրած «Անտիգոնա» ներկայացման պրեմիերայից հետո քննադատները «ջարդուփշուր» են արել այն, նշելով դերասանուհու «աշակերտական» խաղը: Հետո արդեն սկսվում է նրա կյանքի ֆրանսիական շրջանը…»,- նշեց մեր զրուցակիցը:
Հարցին, թե ֆրանսիական Arame Production-ը ինչպես է «գտել» իրեն, Սոնա Վարդանյանը ընդամենն ասաց, որ երկու տարի առաջ այդ կազմակերպության ագենտները ներկա են գտնվել Երեւանի օպերայի թատրոնում Խաչատրյանի «Սպարտակ» ներկայացմանը, որտեղ ինքը հանդես է եկել Ֆրիգիայի դերապարով:
ՍԱՄՎԵԼ ԴԱՆԻԵԼՅԱՆ
Գլխավոր լուսանկարում` Սոնա Վարդանյանը՝ Իդայի կերպարում:
«Առավոտ»
12.01.2017
