Տավուշի մարզկենտրոն Իջեւան քաղաքի կենտրոնական հատվածում, Հայ առաքելական եկեղեցու Տավուշի թեմի առաջնորդանիստ Սուրբ Ներսես Շնորհալի եկեղեցուն կից, նախկին կենցաղի տան հարակից հատվածներում, հակասանիտարական պայմաններում սննդամթերքի բացօթյա առեւտուր է կատարվում: Այդտեղ մթերք վաճառողները հարկեր չեն վճարում:
Հայտնել ենք, որ 2016թ. հունիսի 1-ին եւ 2-ին Տավուշի մարզպետարանի,Իջեւանի քաղաքապետարանի, սննդի անվտանգության պետական ծառայության, ոստիկանության աշխատողներն այդ տարածքներն ազատել են փողոցային անօրինական առեւտրից: Դրանից հետո նշված տարածքներում առեւտուր անող մի խումբ անձինք Տավուշի մարզպետ Հովիկ Աբովյանին մոտ ընդունելության ժամանակ վկայակոչելով իրենց ընտանիքների սոցիալական վատ վիճակը՝ մարզպետին խնդրել էին, որ մինչեւ Վարդավառ փողոցային առեւտուր անեն:
Մարզպետն ընդառաջել էր նրանց խնդրանքը: Տարեմուտին Տավուշի մարզպետարանում կայացած մամուլի ասուլիսի ժամանակ Տավուշի մարզպետին հարցրինք՝ Իջեւանի այդ հատվածները ե՞րբ են ազատվելու փողոցային առեւտրից:
Կարդացեք նաև
Մարզպետն ասաց, որ անձամբ է ներկա եղել Իջեւանի նշված տարածքները փողոցային առեւտրից ազատելու միջոցառմանը, առեւտրականներին բացատրել են դրա անթույլատրելիությունը, նրանք դա ըմբռնել են:
Վարդավառից հետո ինչ-ինչ պատճառներով խնդրի լուծումը երկարաձգվել է: Հովիկ Աբովյանը հավելեց. «Հիմա էլ ամանոր է, չի կարելի մարդկանց տոնական տրամադրությունը փոխել: Տոները կանցնեն,դա լուծվող հարց է, մարդիկ հասկանում են ու պատրաստ են անօրինական առեւտրից հրաժարվելու»:
Ոսկան ՍԱՐԳՍՅԱՆ
