Վաղը հունահռոմեական ըմբշամարտի Հայաստանի ազգային եւ երիտասարդական հավաքականները համատեղ հավաքի են մեկնում Ծաղկաձոր: Մարզիչներն ըմբիշներին հրահանգել են հետներն, անպայման, դահուկներ վերցնել:
Aravot.am-ը ազգային հավաքականի գլխավոր մարզիչ Լեւոն Ջուլֆալակյանին կատակով հարցրեց, թե մեկնում են ըմբշամարտո՞վ զբաղվելու, թե՞ դահուկավազքով: «Ըմբշամարտը սերտորեն կապված է մյուս բոլոր մարզաձեւերի հետ: Եվ կարելի է ասել, որ մեր ըմբիշները լավ պատրաստված են թե դահուկավազքում, թե հեծանվասպորտում, լողում, ֆուտբոլում, բասկետբոլում, ռեգբիում, աթլետիկայում, ծանրամարտում, մարմնամարզությունում, ակրոբատիկայում եւ այլն: Այնպես որ, տղաները շատ մարզաձեւերում կարող են բարձր կարգեր լրացնել», – ասաց Լ. Ջուլֆալակյանը:
Հարցին՝ իսկ կարո՞ղ են հաղթել թվարկված մարզաձեւերի Հայաստանի հավաքականների անդամներին, մարզիչը պատասխանեց. «Մեր գլխավոր նպատակը ըմբշամարտում լուրջ հաջողությունների հասնելն է: Բայց եթե նմանատիպ ընկերական հանդիպումների առաջարկ լինի, չենք խուսափի: Առավել եւս, երբ բոլորը լավ գիտեն, որ ըմբիշները բոլոր մարզաձեւերում էլ լավ պատրաստված են»:
Լեւոն Ջուլֆալակյանը երբեք չի կասկածել ըմբիշների հնարավորություններին: Ավելին, նա ոչ միայն վստահ է, որ իր սաներն արժանապատիվ կպայքարեն, այլեւ չի բացառում, որ հատկապես պրոֆեսիոնալ ըմբիշները ի վիճակի են հաղթել այլ մարզաձեւերի առաջատարներին:
Կարդացեք նաև
Աշոտ ՀԱԿՈԲՅԱՆ
Լուսանկարը՝ vivaronews.am-ի
