Այս տարի կառավարությունը արտահանման, ներդրումների եւ արդյունաբերության ոլորտներում աճ է ակնկալում: Այսօր այս մասին ասաց տնտեսական զարգացման եւ ներդրումների նախարար Սուրեն Կարայանը:
Կառավարության նիստից հետո, պատասխանելով լրագրողների այն հարցին, թե 4 ամիս առաջ Կարեն Կարապետյանն ասաց, որ «երկրի վիճակը չափազանց ծանր է», ինչ փոփոխություններ կան նոր կառավարության օրոք, պարոն Կարայանն ասաց, որ վերանայվել է տնտեսության զարգացման մոդելը. «Հիմնական շեշտադրումը դնում ենք արդեն նրա վրա, որպեսզի մեր տնտեսությունը զարգանա առաջարկի հիման վրա: Այսինքն՝ ելնելով Հայաստանի՝ փոքր տնտեսություն լինելու առանձնահատկությունից, մենք հիմնական շեշտադրումը դնում ենք, որ տնտեսությունը պետք է զարգանա ի հաշիվ արտահանման»:
Պարոն Կարայանի խոսքերով. «Մեր կանխատեսումներն այն են, որ արտահանման մասով այն աճի տեմպերը, որոնք եղել են 2016 թվականին, առնվազն կպահպանվեն կամ կգերազանցվեն: Նաեւ աճ կգրանցվի ներդրումների մասով, բավականաչափ աշխատանք այդ ուղղությամբ 2016-ի վերջին եռամսյակում իրականացվել է: Նախապատրաստել ենք դաշտը եւ ակնկալում ենք, որ 2017 թվականին համ տնտեսական աճը, համ տնտեսական ակտիվության բոլոր ցուցանիշները, այդ թվում՝ արդյունաբերության ու արտահանման, լուրջ աճ կունենան»,- ասաց նախարարը:
Կարդացեք նաև
Լուսինե ԲՈՒԴԱՂՅԱՆ
