Ներմուծումը տեղական արտադրությամբ փոխարինելու համար այսօր կառավարության այս տարվա առաջին նիստում վարչապետ Կարեն Կարապետյանը մի շարք գերատեսչությունների ղեկավարներին հանձնարարականներ տվեց: Վարչապետը հանձնարարեց համատեղ ուսումնասիրել եւ 20-օրյա ժամկետում առաջարկություն ներկայացնել` ըստ առանձին ապրանքների: Նրա խոսքերով, մասնավորապես, պետք է դիտարկել փոխարինման մեխանիզմները, տարբեր հնարավորությունները, այդ թվում՝ առաջինը, համարժեք փոխարինող ապրանքներ, որոնց արտադրության կազմակերպումը տեղում կարող է լինել շահավետ ու մրցունակ ներմուծվողների նկատմամբ:
«Շուկայական մեխանիզմներով պետք է հնարավոր դարձնել ապահովել այդ ապրանքների նկատմամբ պահանջարկը տեղում արտադրության տեսանկյունից ոչ շահավետ ներմուծվող ապրանքների կրճատման հաշվին: Ապրանքներ, որոնց արտադրությունը տեղում կազմակերպելը շահավետ է, դրանք մրցունակ են շուկայում, սակայն գոյություն ունեցող նման արտադրությունների կարողությունները սահմանափակ են կամ տեղում նման արտադրություն չի կազմակերպվում: Ընդ որում, այդ ապրանքների արտադրությունը կազմակերպման կամ արտադրական հզորությունների ավելացման համար կատարվելիք ներդրումները կարելի է հետ բերել միջին ժամկետում»,- ասաց վարչապետը:
Նա նաեւ էներգետիկ համակարգի զարգացման վերաբերյալ հանձնարարականներ տվեց: Նա էներգետիկ ենթակառուցվածքների զարգացման եւ բնական պաշարների, տնտեսական զարգացման եւ ներդրումների նախարարներին հանձնարարեց Հանրային ծառայությունները կարգավորող հանձնաժողովի հետ համագործակցելով, ուսումնասիրել եւ եռամսյա ժամկետում կառավարության աշխատակազմ ներկայացնել «ՀՀ էներգետիկ համակարգի մինչեւ 2036 թվականի զարգացման ուղիները» ծրագրում անհրաժեշտ փոփոխություններ կատարելու առաջարկություն՝ նպատակ դնելով նվազագույն գնով էլեկտրաէներգիայի արտադրություն ունենալ:
«Ելնելով դրանից՝ կարեւորենք տարածաշրջանային երկրների հետ բանակցությունների ակտիվացումը եւ ներքին հնարավորությունների օգտագործումն ու դրա արդյունքում տարածաշրջանի էներգետիկ եւ էլեկտրաէներգայի առեւտրի հնարավորությունների ընդլայնումը»,- ասաց Կարեն Կարապետյանը:
Երկրորդ, նրա խոսքով, պետք է հաշվի առնել ՀՀ տնտեսության զարգացման միտումները, համաշխարհային շուկայում վառելիքի գների փոփոխության տենդենցները, դեպի Իրան եւ Վրաստան էլեկտրահաղորդման նոր հզորությունների կառուցման ուղղությամբ էլեկտրաէներգետիկ համակարգում իրականացվող լայնածավալ ներդրումները, ինչպես նաեւ հաշվի առնելով վերականգնվող էներգետիկայի զարգացման եւ դրանից բխող հանրապետության էներգետիկ անկախության ամրապնդման, էներգետիկ անվտանգության, համակարգի հուսալիության աստիճանի բարձրացման անհրաժեշտությունը:
Կարդացեք նաև
«Խոսքը գնում է այն մասին, որ մենք պետք է ունենանք հստակ ծրագիր՝ հասկանալով, թե ինչ հզորությունների կարիք ենք ունենալու, ինչ հնարավորություններ ենք ունենալու արտահանելու եւ այդ առումով պետք է ունենանք հստակ ծրագիր՝ գնալու առաջ»,- ասաց վարչապետը:
Լուսինե ԲՈՒԴԱՂՅԱՆ
