Լեռնային Ղարաբաղի հակամարտությունը և աշխարհաքաղաքական մյուս հակամարտություններն ազդում են Անկախ պետությունների համագործակցության (ԱՊՀ) երկրների տնտեսությունների վրա: Այս մասին ասվում է Moody’s միջազգային վարկանիշային գործակալության՝ ԱՊՀ երկրներին նվիրված զեկույցում:
Զեկույցում նշվում է, որ թեև նավթի գների կայունացումը թուլացրել է ճնշումը ԱՊՀ 9 երկրների տնտեսությունների և բյուջեների վրա, սակայն տարածաշրջանի վարկունակության կանխատեսումը շարունակում է մնալ «բացասական»:
Զեկույցի հեղինակները կանխատեսում են, որ այս տարի տարածաշրջանում տնտեսական աճը կկազմի 2%, իսկ 2018թ. ակնկալվում է 3%-անոց աճ: Moody’s-ի փոխնախագահ և զեկույցի համահեղինակ Քրիստին Լինդոուն կարծում է, որ ԱՊՀ երկրների տնտեսության վրա, ի թիվս այլ գործոնների, ազդում են նաև աշխարհաքաղաքական հակամարտությունները:
«Ուկրաինայի իրադարձությունների պատճառով Արևմուտքի կողմից Ռուսաստանի դեմ սահմանված պատժամիջոցները, ինչպես նաև Լեռնային Ղարաբաղի հակամարտության գոտում լարվածության ավելացումը բացասական ազդեցություն են թողնում: ԱՊՀ 9 երկրներ հակամարտության մեջ են իրենց հարևանների հետ: Միայն բելառուսա-ղազախական սահմանին է, որ որևէ խնդիր չկա»,- ասել է նա:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
