«Տեղեկությունը պաշտոնական չէ, այն ներկայացրել է թուրքական պարբերականը՝ պատի կառուցմամբ զբաղվող ընկերության անունից»,-Aravot.am-ի հետ զրույցում անդրադառնալով տեղեկություններին, որ Թուրքիան մտադիր է ՀՀ-ի, ինչպես նաեւ՝ Իրանի հետ սահմանը զատել բետոնե պատով, ասաց թուրքագետ Լեւոն Հովսեփյանը:
Նա նկատեց, որ Թուրքիան դեռեւս մի քանի տարի առաջ ներդրել էր սահմանային վերահսկողության եւ անվտանգության ապահովման նոր մեխանիզմների ծրագիր, իսկ որ այն վերաբերում է նաեւ ՀՀ-ի հետ սահմանին պատ կառուցելուն, կարելի է ասել՝ նորություն է, թեւ՝ ոչ պաշտոնական:
«Սիրիայի սահմանի դեպքում պատի կառուցումը հասկանալի է, որովհետեւ կա ահաբեկչության, մաքսանենգության խնդիր: Նույնը որոշակիորեն վերաբերում է իրանաթուրքական սահմանին, եթե հաշվի ենք առնում ահաբեկչության եւ քրդական PKK-ի խնդիրը: Մաքսանենգության խնդիրն էլ իրանաթուրքական սահմանին բավականին լուրջ է: Իսկ ՀՀ-ի հետ սահմանին պատի կառուցումն անիմաստ է եւ Թուրքիային առարկայական ոչինչ չի տա, որովհետեւ սահմանախախտումներ շատ քիչ են գրանցվում: Այստեղ լուրջ խնդիր չկա, որովհետեւ առկա է լուրջ վերահսկողություն»,-եզրափակեց Լեւոն Հովսեփյանը:
Լուիզա ՍՈՒՔԻԱՍՅԱՆ
