Բուլղարացի գրոսմայստեր Վեսելին Տոպալովը հրաժարվեց մասնակցել «FIDE Grand Prix 2017»-ին: Նա այդ որոշումը հիմնավորել է այն բանով, որ ՖԻԴԵ-ն բացարձակապես շախմատի զարգացման ռազմավարություն չունենալու պատճառով չի կարողացել հովանավորներ ներգրավել եւ մրցաշարի առաջատար շախմատիստների համար բարենպաստ պայմաններ ապահովել:
Նրան զարմացնում է, որ վերջին տարիներին կասկածելի, անգամ բացահայտ հանցավոր անցյալ ունեցող ավելի ու ավելի շատ մարդիկ են առաջ քաշվում ղեկավար պաշտոններ: Մասնավորապես, ՖԻԴԵ-ի նախագահ Կիրսան Իլյումժինովը միջազգային ֆինանսական մեքենայությունների կասկածանքով հայտնվել է ԱՄՆ-ի սեւ ցուցակում, իսկ նրա տեղակալ Գեորգիուս Մակրոպուլոսը միջազգային ֆեդերացիայի օժանդակությամբ աշխատանքի է տեղավորել իր ընկերուհուն:
Տոպալովը չի շրջանցել նաեւ ԵՇՄ-ի նախագահ Զուրաբ Ազմայրփարաշվիլուն, որը նրա խոսքերով ներքաշված է մի շարք սկանդալների մեջ եւ շախմատը Եվրոպայում զարգացնելու ուղիներ փնտրելու փոխարեն աշխատում է խնդիրներ ստեղծել Բուլղարիայի շախմատի ֆեդերացիայի համար:
Այս հանգամանքները հաշվի առնելով, Վեսելին Տոպալովը հրաժարվում է մասնակցել ՖԻԴԵ-ի ու ԵՇՄ-ի հովանու ներքո անցկացվող բոլոր մրցաշարերին այնքան ժամանակ,, մինչեւ, ինչպես օրերս շախմատիստի մենեջեր Սիլվիո Դանաիլովն էր հայտարարել, այդ կազմակերպությունների ղեկավարությունը դրական փոփոխությունների չենթարկվի:
Կարդացեք նաև
Աշոտ ՀԱԿՈԲՅԱՆ
Լուսանկարը՝ rus.bg-ի
