Թուրքիայի իշխանությունները խլել են Diken լրատվական պորտալի և Al-Monitor կայքի սյունայակագիր Ամբերին Զամանի լրագրողական քարտը՝ Նոր տարվա գիշերը Ստամբուլում գիշերային ակումբում տեղի ունեցած հարձակման վերաբերյալ Twitter-ում կատարված գրառման պատճառով: Այս մասին գրում է Turkish Minute-ը:
Թուրքիայի վարչապետի գրասենյակից հայտնել են, որ Զամանին լրագրողական քարտից զրկել են, քանի որ նրա գրառումը հանգեցրել է հանրության բևեռացմանը՝ մարդկանց մղելով ատելության և թշնամության:
Ստամբուլում 39 մարդու կյանք խլած հարձակումից հետո Զամանը Twitter-ում գրել էր, որ Սիրիայի քրդերն ամենաարդյունավետ ուժն են «Իսլամական պետության» դեմ:
Ստամբուլի ահաբեկչության պատասխանատվությունը ստանձնել է «Իսլամական պետությունը»:
Կարդացեք նաև
«Քանի դեռ YPG-ն (Ժողովրդական ինքնապաշտպանության ջոկատներ) և SDG-ն (Սիրիայի ժողովրդավարական ուժեր) ամենաարդյունավետ ուժն են ԻՇԻՊ-ի դեմ, ԱՄՆ-ը համագործակցում է նրանց հետ, բայց երբ դու բարձրաձայնում ես այդ մասին, քեզ վերաբերում են ինչպես «դավաճանի»: Հետաքրքիր է, արդյոք ԻՇԻՊ-ի դեմ ամենաարդյունավետ ուժերի՝ YPG-ի և SDG-ի վրա հարձակումները կշարունակվեն»,- գրել էր Զամանը Twitter-ի իր միկրոբլոգում:
Դրանից հետո Զամանը սոցցանցերում հարձակումների էր ենթարկվել իշխանամետ որոշ լրագրողների կողմից:
Պատրաստեց՝ Վիկտորյա ԱՆԴՐԵԱՍՅԱՆԸ
