Սուրբ Ծննդյան Պատարագի ավարտին այսօր ԱՀԹ Առաջնորդանիստ Սուրբ Սարգիս եկեղեցում կատարվեց Ջրօրհնեքի կարգ, որը խորհրդանշում է Հորդանան գետում Հիսուս Քրիստոսի մկրտությունը:
Ս. Խաչով և Սրբալույս Մյուռոնով օրհնված հրաշագործ ջուրը բաժանվեց հավատավորներին: Այս անգամ էլ քաղաքացիներն աչքի ընկան միմյանց հանդեպ ոչ հարգալից վերաբերմունքով՝ հրում էին իրար, երբեմն բարձր ձայնով դիմում եկեղեցու սպասավորներին, պատճառաբանում, թե «հիվանդ երեխայի համար է», «հիվանդ են՝ սպասել չեն կարող»: Քչերն էին, որ համբերատար սպասում էին սուրբ ջուրը ստանալու իրենց հերթին՝ ասելով. «հանգիստ, ժողովուրդ ջան, բոլորին էլ կհասնի…»:
Aravot.am-ի եւ «Շանթ» հ/ը-ի հետ զրույցում անդրադառնալով երեւույթին՝ Արարատյան հայրապետական թեմի տեղեկատվական բաժնի համակարգող Տեր Եսայի քահանա Արթենյանն ասաց. «Ամեն անգամ նման իրողության առջեւ ենք կանգնում, թեեւ տարեցտարի մարդիկ առավել գիտակից կերպով են մոտենում այս խորհրդին: Սա նաեւ մարդկային տկարության դրսեւորումներից է, երբ դժվարանում են փոքր-ինչ ավել սպասել: Անխուսափելի է, բայց տարեցտարի մարդիկ ավելի քաղաքակիրթ են դառնում, ինչն ուրախալի է»:
Կարդացեք նաև
Այլ մանրամասները՝ տեսանյութում:
Լուիզա ՍՈՒՔԻԱՍՅԱՆ
