Հիսուս Քրիստոսի հրաշափառ Ծննդյան ու Աստվածհայտնության տոնի առթիվ այսօր եկեղեցիներում մատուցվեց Սուրբ Ծննդյան տոնական Սուրբ Պատարագ: Արարատյան Հայրապետական թեմի առաջնորդանիստ Ս. Սարգիս եկեղեցում պատարագը մատուցվեց առաջնորդական փոխանորդ Գերաշնորհ Տ. Նավասարդ արքեպիսկոպոս Կճոյանի հանդիսապետությամբ:
Պատարագի ավարտին ներկաներին փոխանցվեց Ս. Ծննդյան և Հայտնության Ավետիսը. «Քրիստոս ծնավ և հայտնեցավ. Օրհնյալ է հայտնությունը Քրիստոսի»: Տ. Նավասարդ արքեպիսկոպոս Կճոյանը հավատավորների համար ընթերցեց Ամենայն Հայոց կաթողիկոսի պատգամը՝ Սուրբ Ծննդյան տոնի առթիվ:
Կարդացեք նաև
«Սուրբ Ծնունդը տարվա առաջին՝ կարեւորագույն տաղավար տոներից է: Նոր տարին եւ Սուրբ Ծնունդն իրենց խորհուրդներով կարծես թե չեն համընկնում, որովհետեւ Նոր Տարվա խնջույքը եւ Սուրբ Ծննդյան պահոց շրջանը համատեղելի չեն: Բնականաբար, մարդկանց հորդորում ենք, որ առավել կարեւորեն Սուրբ Ծննդյան տոնը»,-խոսելով տոնի խորհրդի մասին՝ Aravot.am-ի եւ «Շանթ» հ/ը-ի հետ զրույցում ասաց Արարատյան հայրապետական թեմի տեղեկատվական բաժնի համակարգող Տեր Եսայի քահանա Արթենյանը:
Հավելենք, որ վաղը, ինչպես բոլոր տաղավար տոներին հաջորդող օրերին, հանգուցյալների հիշատակության օր է` Մեռելոց: Ս. Պատարագի ավարտին բոլոր եկեղեցիներում կատարվում է հոգեհանգստյան արարողություն, որից հետո մարդիկ այցելում են ննջեցյալների շիրիմիներին:
Լուիզա ՍՈՒՔԻԱՍՅԱՆ
