Բելառուսի նախագահ Ալեքսանդր Լուկաշենկոն չի ստորագրել Եվրասիական տնտեսական միության (ԵԱՏՄ) մաքսային օրենսգիրքը, այլ միայն հավանություն է տվել նախագծին: Այս մասին այսօր տեղի ունեցած ճեպազրույցում հայտարարել է Բելառուսի ԱԳՆ մամուլի քարտուղար Դմիտրի Միրոնչիկը, հաղորդում է «ՌԻԱ Նովոստին»:
Հիշեցնենք, Բելառուսը ներկա չի գտնվել դեկտեմբերի 26-ին Սանկտ Պետերբուրգում նախագահների մակարդակով տեղի ունեցած Եվրասիական տնտեսական գերագույն խորհրդի նիստին, որտեղ ստորագրվել է Մաքսային օրենսգիրքը:
Ավելի ուշ Բելառուսի նախագահ Ալեքսանդր Լուկաշենկոն իր հրամանով հավանություն է տվել ԵԱՏՄ մաքսային օրենսգրքի մասին պայմանագրի նախագծին՝ որպես բանակցությունների համար հիմք և լիազորել է երկրի Պետական մաքսային կոմիտեին այդ ուղղությամբ բանակցություններ վարել:
«Մի շարք ԶԼՄ-ներ այնքան էլ ճիշտ չեն մատուցել այս նորությունը: Ստորագրվել է ոչ թե մաքսային օրենսգիրքը, այլ բանակցություններ վարելու հրամանը»,- ասել է Միրոնչիկը:
Կարդացեք նաև
Նա հավելել է, որ պայմանագրի նախագծի վերաբերյալ բոլոր սկզբունքային հարցերը, որպես կանոն, համաձայնեցվում են նախապես, բայց մինչև ստորագրելը դրանում կարող են փոփոխություններ մտցվել:
Պատրաստեց՝ Վիկտորյա ԱՆԴՐԵԱՍՅԱՆԸ
