Հունվարի վերջին տասնօրյակում արդեն վաճառքի կլինի հայկական նոր երիգիծաթերթը՝ «Ցեց»-ը, որի առաջին համարը լույս տեսավ անցած տարեվերջին:
«Մեդիալաբ»-ի հիմնադիր Մարիաննա Գրիգորյանը, որը նաեւ երգիծաթերթի գլխավոր խմբագիրն է, Aravot.am-ին պատմեց, որ նման երգիծաթերթ հրապարակելու միտք վաղուց են ունեցել, բայց անցած տարի Վանաձորում տեղի ունեցած ցուցահանդեսի ժամանակ որոշեցին միտքն իրագործել: Խմբագրակազմը որոշել էր նաեւ թերթն անվճար տարածել հանրային տրանսպորտում, մետրոպոլիտենում, սակայն քաղաքապետարանն արգելել է՝ առանց ծանոթանալու թերթի բովանդակությանը:
Մարիաննա Գրիգորյանի խոսքով, երբ իրենք քաղաքապետարանին էին դիմել՝ թույլտվության համար, դեռ թերթը լույս չէր էլ տեսել:
«Ենթադրաբար մեր կայքի երգիծանկարները նայել են, հասկացել են, որ մի բան չէ, որ կարելի է ցույց տալ: Քանի որ մենք քննադատում ենք իշխանությունների վարած քաղաքականությունը, կարծում եմ՝ փորձել են մերժումով կասեցնել մեր ընթացքն ինտերնետից դուրս: Առհասարակ անդրադառնում ենք բոլոր քաղաքական այն ուժերին, որոնք գտնվում են իրադարձությունների կենտրոնում եւ տվյալ պահին հետաքրքրություն են ներկայացնում, անկողմնակալ անդրադառնում ենք բոլորին, չենք խնայում ոչ մեկին: Մեր նպատակը քաղաքական ծաղրանկարներն՝ իրենց մեծ ազդեցությամբ նաեւ ինտերնետից դուրս հանելն էր եւ հասանելի դարձնելը մարզերում, գյուղերում: Բացի սրանից, մենք ուզում էինք դաշտ բերել երգիծաթերթը, Հայաստանում սա առաջին երգիծաթերթն է»,- ասաց Մարիաննա Գրիգորյանը:
Կարդացեք նաև
Երեւանի քաղաքապետ Տարոն Մարգարյանի խորհրդական Արթուր Գեւորգյանը թերթի տարածման մերժումը գրավոր հիմնավորել է այսպես. «Հաշվի առնելով, որ «ՑԵՑ»-ը քաղաքական ծաղրանկարների ամսաթերթ է, տեղադրումը հասարակական տրանսպորտում եւ մետրոպոլիտենի կայարաններում հնարավոր է ուղեւորների եւ քաղաքացիների դժգոհությունների ու անձերի նկատմամբ վիրավորանքի պատճառ դառնա, ուստի այս խնդրանքի բավարարումը գտնում ենք ոչ նպատակահարմար»:
Լուսանկարը` Մարիաննա Գրիգորյանի ֆեյսբուքյան էջից:
Արփինե ՍԻՄՈՆՅԱՆ
